Aqmola oblysynda ósimdikter karantıni jónindegi ınspektor jalǵan sertıfıkattar bergen

KÓKShETAÝ. QazAqparat – Aqmola oblysynda kásipkerlerge karantınge jatqyzylǵan ónimdi oblystan jáne QR-dan tys jerlerge tasymaldaýǵa quqyq beretin fıtosanıtarııalyq jáne karantındik sertıfıkattar bergen sheneýnik sottaldy, dep habarlaıdy QazAqparat tilshisi.

Aqmola oblysy boıynsha Sybaılas jemqorlyqqa qarsy is-qımyl departamenti baspasóz qyzmetiniń málimetinshe, QR AShM Agroónerkásiptik keshendegi memlekettik ınspektsııa komıteti Kókshetaý qalalyq aýmaqtyq ınspektsııasynyń bas mamany - ósimdikter karantıni jónindegi ınspektory Aınagúl Ismaılova 2021-2022 jyldar aralyǵynda karantınge jatqyzylǵan ónimdi tekserýge barmaı-aq, karantındik fıtosanıtarııalyq baqylaý jáne qadaǵalaý aktilerine kórineý jalǵan málimetter engizgen. Jalǵan aktiler negizinde ol kásipkerlerge karantınge jatqyzylǵan ónimdi oblystan jáne QR-dan tys jerlerge tasymaldaýǵa quqyq beretin fıtosanıtarııalyq jáne karantındik sertıfıkattar bergen.

«Sot Aınagúl Ismaılovany memlekettik qyzmette jáne kvazımemlekettik sektorda qyzmet atqarýǵa ómir boıyna tyıym sala otyryp, 1 jyl jáne 100 saǵat túzetý jumystary merzimine bas bostandyǵyn shekteý jazasyna kesti.

Sot úkimi zańdy kúshine engen joq», - dedi vedomstvodan.

Sonymen birge, Kókshetaý qalalyq aýmaqtyq ınspektsııasynyń basshysy Ismaılovanyń tikeleı basshysy retinde qaramaǵyndaǵylardy tıisinshe baqylamaǵany úshin memlekettik qyzmetten bosatyldy, budan bólek Aqmola oblystyq aýmaqtyq ınspektsııasynyń basshylyǵy túrli tártiptik jazaǵa tartyldy.

Aıta ketsek, budan buryn Aqmola oblysynda kásipkerge 5 mln teńgedeı zańsyz aıyppul salmaq bolǵan sheneýnikter jazalanǵan edi.