Aqmola oblysynda órtten ákesi men balasy qaıtys boldy
KÓKShETAÝ. QazAqparat – Aqmola oblysynda órt eki adamnyń ómirin qıyp ketti, dep habarlaıdy QazAqparat tilshisi.
Vedomstvonyń málimetinshe, aǵymdaǵy jyly aqpannyń 23-de saǵat 03:55 mınýt shamasynda Zerendi aýdandyq órt sóndirý bóliminiń pýltine Alekseevka aýylyndaǵy úıdiń órtenip jatqany týraly habarlama kelip tústi. Shaqyrý ornyna Zerendi aýdanynyń jáne Kókshetaý qalasynyń órt sóndirý jasaqtary jiberildi. Órtti sóndirý jáne úıdiń qurylymyn buzý barysynda eki adamnyń denesi tabyldy.
«Kýágerlerdiń sózinshe, qaza bolǵan otaǵasy órt kezinde eki balamen úıde bolǵan. Ol balalardyń birin úıden alyp shyǵyp, ekinshisin qutqarmaqshy bolǵanda úıden shyǵa almaı qalǵan. Tilsiz jaýdy aýyzdyqtaýǵa TJD jeke quramynan 20 adam jáne 5 arnaıy órt sóndirý tehnıkasy jumyldyryldy. Órt saǵat 05:00 mınýtta aýyzdyqtalyp, 06:40-ta tolyq sóndirildi», - dedi vedomstvodan.
TJD baspasóz qyzmetinen atap ótkendeı, qazirgi kezde órttiń shyǵý sebebi jáne adamdardyń qaza bolýyna qatysty sotqa deıingi tergeý sharalary júrgizilýde. Sondaı-aq, sot medıtsınalyq saraptama taǵaıyndalyp, órt - tehnıkalyq zerthana zertteý júrgizýde.
