Aqmola oblysynda órtten 2 adam kóz jumdy
KÓKShETAÝ. QazAqparat - Aqmola oblysynyń Birjan sal aýdanyndaǵy turǵyn úıde bolǵan órtten 2 adam kóz jumdy, dep habarlaıdy QazAqparat tilshisi oblystyq TJD baspasóz qyzmetine silteme jasap.
Vedomstvonyń málimeti boıynsha, órt 4 naýryzda Baımyrza aýylynda bolǵan.
«Tilsiz jaýdy aýyzdyqtaýǵa aýmaqtyq TJD jeke quramynan 11 adam jáne 3 arnaıy tehnıka taratyldy. Oqıǵa ornynan 2 adamnyń máıiti tabyldy», - dep aıtty vedomstvonyń baspasóz qyzmetindegiler.
Aıta keteıik, vedomstvonyń málimetine súıensek, jyl basynan beri oblys boıynsha barlyǵy 173 órt oqıǵasy tirkelgen. Bul byltyrǵy jyldyń kórsetkishimen salystyrǵanda, 5 oqıǵaǵa az. Jyl basynan beri TJD qyzmetkerleri PD, jergilikti atqarýshy organdar jáne eriktilermen birlesip, 56 627 aýlany aralap, 140 adamnyń qatysýymen 493 jınalys ótkizdi.
