Aqmola oblysynda ortalyqtandyrylǵan sýmen qamtý deńgeıi qandaı

NUR-SULTAN. QazAqparat – Bıyl Aqmola oblysyndaǵy 54 eldi mekende taza aýyz sýmen qamtamasyz etý jobasy iske asyryldy. Bul týraly óńir ákimi Ermek Marjyqpaev aıtty, dep habarlaıdy QazAqparat tilshisi.

«Bıyl halyqty taza aýyz sýmen qamtýdy keńeıtý maqsatynda oblystaǵy 54 eldi mekende (62 joba) jobalar iske asyrylyp jatyr. Jobalar aıaqtalǵannan keıin 30 myń aýyl turǵyny ortalyqtandyrylǵan sýmen qamtamasyz etiledi, qamtý deńgeıi 83 paıyzǵa jetedi», - dedi oblys ákimi Ortalyq kommýnıkatsııalar qyzmetinde.

2023 jylǵa deıin ázirlengen sýmen jabdyqtaý jáne sý burý júıesin damytý jónindegi jol kartasy sheńberinde 118 eldi mekende sý qubyry jelisin salý, 60 shaǵyn aýylda jergilikti blok-modýldi ornatý josparlanyp otyr.

Budan buryn habarlanǵandaı, bıyl Aqmola oblysynda 570 myń sharshy metr turǵyn úı paıdalanýǵa beriledi. Sonymen qatar azyq-túlik beldeýi aıasynda óńirde 41 joba iske asyrylyp jatyr.