Aqmola oblysynda órt oqıǵasy jıilep otyr-TJD
KÓKShETAÝ. QazAqparat - Aqmola oblysynyń Aqkól, Bulandy, Zerendi aýdandary jáne Kókshetaý qalasynda sońǵy bir aptanyń ishinde turǵyn úıde bolǵan órtten 7 adam ajal qushty dep, habarlaıdy QazAqparat tilshisi.
Aımaqtyq TJD deregi boıynsha órttiń oryn alýyna turǵyndardyń órt qaýipsizdigi erejelerin saqtamaıtyndyǵy sebep bolyp otyr. Atalmysh kezeńde oblysta 146 órt oqıǵasy tirkelip, 13 adam kóz jumdy jáne 1 adam zardap shekti.
Kóp jaǵdaıda adamdar ishimdik iship tósekte jatyp temeki shegý, qoldan jasalǵan elektr jylytqyshtardy qoldanýdyń sońy qaıǵyǵa ákelip soqtyratynyn bilse de, saqtyq sharalaryna kóńil bóle bermeıdi.
Máselen, 10 aqpan kúni Aqkól qalasynda Karl Marks kóshesiniń boıyndaǵy turǵyn úıde órt boldy. Tilsiz jaýdy aýyzdyqtaý kezinde 1958, 1971 jáne 1986 jyldary týǵan úsh er adamnyń máıiti tabyldy. Keıin belgili bolǵandaı órt marqumdardyń alkogoldik ishimdik iship alyp, tósekte temeki shegýinen tutanǵan.
13 aqpanda Makınsk qalasyndaǵy jekemenshik turǵyn úı órtenip, 1933 jylǵy B.F. Obıdın esimdi qarııa kóz jumdy. Bul joly múgedek qarııamen birge qaldyryp ketken 4 jastaǵy bala sirińkemen oınaımyn dep úıdi órtep jibergen.
15 aqpan kúni Zerendi aýdanynyń Ortaq aýylynda jekemenshik úıden órt shyqty. Tilsiz jaýdy aýyzdyqtaýǵa TJD jeke quramynan 10 adam jáne 2 arnaıy tehnıka, kezekshi jedel tergeý tobynyń (KJTT) 4 qyzmetkeri men 1 tehnıkasy tartyldy. Oqıǵa ornynan 1956 jylǵy R.B. Danııarova jáne 1982 jylǵy E.K.Danııarovtyń denesi tabyldy. Al, Kókshetaý qalasyndaǵy «Kókshe Stroı metall» seriktestiginiń qurylys vagonynda bolǵan órtten 1958 jylǵy A.A. Smehnov kóz jumdy. Sońǵy eki jaǵdaıda elektr jylytqyshyn qoldaný kezinde órt qaýipsizdigi erejesiniń saqtalmaǵany anyqtaldy.
«Osyǵan oraı, tótenshe jaǵdaılar departamentiniń qyzmetkerleri úı úıdi aralap, turǵyndarǵa órt qaýipsizdigi erejelerin qatań saqtaý qajettigin túsindirýde», dep túsindirdi TJD baspasóz qyzmetindegiler.
