Aqmola oblysynda onomastıka máselelerine arnalǵan semınar ótti
NUR-SULTAN. QazAqparat - Aqmola oblysynyń ishki saıasat basqarmasy 2019 jylǵy 27 qarashada «Onomastıka: zertteý jáne tájirıbe» atty oblystyq praktıkalyq semınar uıymdastyrdy, dep habarlaıdy QazAqparat.
Atalmysh shara Qazaqstan Respýblıkasynda Tilderdi damytý men qoldanýdyń 2011-2019 jyldarǵa arnalǵan Memlekettik baǵdarlamasyn iske asyrý jónindegi 2017-2019 jyldarǵa arnalǵan oblystyq is-sharalar josparyn oryndaý maqsatynda uıymdastyryldy.
Maqsaty – Aqmola oblysyna qarasty jer-sýlar men eldi-mekenderdiń tarıhı ataýlaryn anyqtaý. Ǵalymdardyń osy taqyryptaǵy zertteýlerin kópshilikke nasıhattaý. Óńirimizde onomastıka máselesimen aınalysatyn mamandarǵa ádistemelik kómek kórsetý.
Semınarǵa oblystyq onomastıka komıssııasynyń músheleri, Kókshetaý qalasynyń onomastıka jumysy boıynsha toby, aýdandyq jáne qalalyq mádenıet jáne tilderdi damytý bólimderiniń basshylary men mamandary, oblystyq jáne qalalyq arhıvterdiń, Kókshetaý qalasyndaǵy mýzeılerdiń qyzmetkerleri, tarıh pániniń muǵalimderi jáne zııaly qaýym ókilderi qatysty.
Semınardy Aqmola oblystyq tarıhı-ólketaný mýzeıiniń dırektory, oblystyq onomastıka komıssııasynyń múshesi Shaqshaqov Qýanysh Ǵıbadatuly júrgizdi.
Atalǵan jıynda onomastıka salasy baǵytynda ǵylymı zertteýlermen aınalysyp júrgen ǵalymdardyń baıandamalary tyńdaldy.
L.Gýmılev atyndaǵy Eýrazııa Ulttyq ýnıversıtetiniń tarıh fakýlteti arheologııa jáne etnologııa kafedrasynyń professory, tarıh ǵylymdarynyń doktory Jambyl Omaruly Artyqbaev «Aqmola oblysynyń tarıhı toponımderi: zerttelý barysy, qasıettilik sınonımi», Sh.Ýálıhanov atyndaǵy Kókshetaý memlekettik ýnıversıteti tarıh, zańtaný, óner jáne sport fakýltetiniń dekany, tarıh ǵylymdarynyń kandıdaty, QR tarıh jáne qoǵamdyq ǵylymdar akademııasynyń akademıgi Bekseıitova Aqbota Tastanbekqyzy «Aqmola oblysynyń tarıhı toponımıkasynyń keıbir máseleleri» taqyrybynda, Aqmola oblystyq «Arqa ajary» gazetiniń redaktory, oblystyq onomastıka komıssııasynyń múshesi Tóreǵoja Qaıyrbaı Zeınollauly «Onomastıka: mindet pen nátıje», Sh.Ýálıhanov atyndaǵy Kókshetaý memlekettik ýnıversıteti jalpy tarıh jáne áleýmettik-gýmanıtarlyq ǵylymdar kafedrasynyń aǵa oqytýshysy Tólepbergenov Ǵalymtaı Málikuly «Aqmola oblysynyń ejelgi jer-sý ataýlary», Qazaqstan Respýblıkasy Ulttyq mýzeıi «Halyq qazynasy» ǵylymı zertteý ınstıtýtynyń tarıhı-mádenı mura nysandaryna monıtorıng jáne saraptama júrgizý bóliminiń ǵylymı qyzmetkeri Irına Bekzatqyzy «Eldi-mekenderdiń tarıhı ataýlaryn qaıtaraıyq!» degen taqyrypta baıandamalar kópshilik nazaryna usynyldy.
