Aqmola oblysynda onkologııalyq ortalyq ashyldy
KÓKShETAÝ. QazAqparat - Elimizde densaýlyq saqtaý salasyndaǵy máselelerdi sheshý úshin mol qarjy bólinýde.
Osy rette Aqmola oblysynyń densaýlyq saqtaý júıesine bıyl 73,4 mıllıard teńge qarjy bólinse, onyń 14 mıllıardy koronovırýspen kúresýge baǵyttalyp otyr, dep habarlaıdy QazAqparat tilshisi oblystyq ishki saıasat basqarmasynyń baspasóz qyzmetine silteme jasap.
Bıyl aýrýhanalar men emhanalardy jóndeýge úlken qarajat bólindi. Sandyqtaý aýdandyq aýrýhanasynda kúrdeli jóndeý jumystary júrgizilýde, Astrahan, Egindikól aýrýhanalary jóndelýde, onda mundaı jumystar buryn júrgizilmegen. Memlekettik-jekeshelik áriptestik sheńberinde «Avıtsenna-Býrabaı» JShS tolyq jabdyqtalǵan 40 tósektik ınfektsııalyq bólimshe ǵımaratyna kúrdeli jóndeý jumystaryn júrgizýde. Aımaq basshysy Ermek Marjyqpaevtyń qatysýymen oblys ortalyǵynda 150 kelýshige arnalǵan onkologııalyq ortalyq ashyldy.
«Ortalyqta zaman talabyna saı, zamanaýı jabdyqtar ornatylyp, bilikti mamandar tartylǵan. Osylaısha, birlesip óńirde syrqattaný boıynsha jaǵdaıdy jaqsartamyz dep senemin», - dep atap ótti Ermek Marjyqpaev.
Qazirgi zamanǵy emdeý mekemesinde qaterli isigi bar naýqastarǵa, sondaı-aq, dıspanserlik esepte turǵan adamdarǵa konsýltatsııalyq-dıagnostıkalyq kómek kórsetiletin bolady. Ortalyqta zamanýı medıtsınalyq jabdyqtar – MRT, KT apparattary, 3 jumys ornyna arnalǵan rentgen apparaty, stereotaksıs fýnktsııasy bar mamograf, sondaı-aq endoskopııalyq jabdyqtardyń tolyq jelisi bar. Qabyldaý 8 mamandyq boıynsha júrgiziledi. Búginde medıtsına qyzmetkerlerin osynda kóshirý jumystary qolǵa alynyp otyr. Aqmola oblystyq kópbeıindi aýrýhananyń dırektory Nurlan Jarovtyń aıtýynsha, nysanda syrqattaný deńgeıin tómendetý úshin barlyq jaǵdaı jasalǵan.
