Aqmola oblysynda onkologııalyq aýrýlardy anyqtaý boıynsha 40-tam astam zertteý júrgizildi
KÓKShETAÝ. QazAqparat - Aqmola oblysynda onkologııalyq aýrýlardy anyqtaý boıynsha júrgizilgen ashyq esik kúni sheńberinde jergilikti onkodıspanser dárigerleri 40-tan astam zertteý júrgizdi, dep habarlaıdy QazAqparat tilshisi.
Oblystyq densaýlyq saqtaý basqarmasynyń baspasóz hatshysy Nabıra Esenovanyń aıtýynsha, shara barysynda turǵyndar onkolog-mammolog, gınekolog, hırýrg, ýrolog tárizdi dáriger mamandardan keńes aldy. Sondaı-aq, súıek jáne keýde kletkasy organdaryn tekserdi. ÝZI kabınetinde 40-tan astam zertteý jumystary júrgizildi. Mamandar keńesine ár jastaǵy adamdar júginip, denderiniń saýlyǵyna kóz jetkizdi. Alaıda, zertteý jumystarynyń nátıjesinde 2 áıelde sút beziniń qaterli isigi anyqtaldy. Dárigerler derttiń kesh bosaný, balany emizbeý jáne stresstiń áserinen bolatynyn aıtýda.
«Áıelderde sút bezi qaterli isigi - jıi kezdesetin ári ómirge qaýipti syrqat. Bul aýrýdan tolyq jazylyp ketýge bolady jáne bul árkimniń óz qolynda. Ony emdeıtin jáne zertteıtin sala - mammologııa. Sondyqtan, bastapqyda eshqandaı sımptomsyz paıda bolatyn dertti dıagnostıka ádisi arqyly erte bastan anyqtap, aldyn alýǵa bolady.
Osy kúni Aqmola oblysynda aýrýdy anyqtap, tekseristen ótýge barlyq jaǵdaı jasalǵan. Qajet bolǵan kezde, keshendi túrde em qabyldaýǵa bolady. Ol úshin, árıne, áıelderdiń ózderi densaýlyqtaryna nemquraıly qaramaı, dárigerge ýaqtyly qaralyp otyrýy kerek», - dedi Nabıra Esenova.
