Aqmola oblysynda ónimdilikti arttyrý úshin qandaı agrotehnıkalyq is-sharalar júrgizilýde
Vedomstvonyń málimetinshe, aýyl sharýashylyǵy daqyldarynyń ónimdiligi men sapalyq kórsetkishterin arttyrý maqsatynda óńirde agrotehnıkalyq sharalar júzege asyrylyp jatyr.
Sonymen birge, topyraqtyń qunarlylyǵyn jaqsartý úshin mıneraldy tyńaıtqyshtardy qoldanýǵa kóp kóńil bólinýde.
«Bıylǵa josparlanǵan 110 myń tonna tyńaıtqyshtyń 100 myń tonnasy satyp alyndy. Tyńaıtqysh engizý jumystary shilde-qazan aılarynda júrgiziledi. Egistikti aramshópterden qorǵaý úshin oblys fermerleri 4,4 mıllıon gektar (jospardan 109,4 paıyz) alqapta hımııalyq óńdeý jumystaryn qolǵa aldy, onyń ishinde qosjarnaqty aramshópterge - 2,8 mıllıon gektar, dándi daqyldarǵa - 1,6 mıllıon gektar», - dep túsindirdi vedomstvodan.
Budan bólek, qazirgi ýaqytta dándi daqyldar aýrýy (septorııa) jáne ósimdik zııankesteri (bıdaı trıpsi), sondaı-aq, shegirtkege qarsy is-sharalar barysynda 223,2 jáne 368,9 myń gektar alqap óńdeldi.
«Sonymen qatar, Aqmola oblysynda ósimdik zııankesterimen jáne karantındik obektilermen kúresý jumystaryn úılestirý jáne ýaqtyly den qoıý boıynsha jedel shtabtar jumys isteıdi. Osy shtabtardyń úılesimdi jumysynyń arqasynda 4,5 myń gektar alqapta otar shegirtkege qarsy, 42,6 myń gektarda otar emes shegirtke zııankesterine qarsy hımııalyq óńdeý jumystary aıaqtaldy. Onyń ishinde 5,5 myń gektary aýyl sharýashylyǵy maqsatyndaǵy jerler, 37,1 myń gektary memlekettik qordaǵy jerler», - dep tolyqtyrdy vedomstvodan.
Vedomstvodan atap ótkendeı, óńirde agrotehnıkalyq is-sharalardyń barlyq tsıklin sapaly ótkizý máselesi turaqty baqylaýda.
Aıta ketsek, budan buryn Aqmola oblysynda jaıylymdyq jerlerdiń tapshylyǵy qalaı sheshilip jatqandyǵynjazǵan edik.
