Aqmola oblysynda ónegeli otbasylarǵa syılyqtar tapsyryldy

KÓKShETAÝ. QazAqparat - Aqmola oblysynda Halyqaralyq otbasy kúnine oraı ónegeli otbasylar aımaq basshysy Ermek Marjyqpaevtyń atynan estelik syılyqtarǵa ıe boldy, dep habarlaıdy QazAqparat tilshisi.

Kókshetaý qalasyndaǵy «Neke saraıynda» ótken sharaǵa aımaq basshysynyń orynbasary Aına Mysyrálimova qatysyp, aqmolalyqtar úlgi tutar otbasylardy quttyqtap, olarǵa kórsetilip jatqan qoldaý sharalaryna toqtaldy.

«Táýelsizdiktiń 30 jylynda otbasy ınstıtýtyn nyǵaıtý – memlekettik saıasattyń basym baǵyttarynyń biri boldy. Jyl saıyn elimizde Otbasy kúnin atap ótý, «Mereıli otbasy» ulttyq baıqaýyn ótkizý dástúrge aınalǵan. Qazaqstandyqtardyń ál-aýqatyn kóterýge, otbasyn jan-jaqty qoldaýǵa arnalǵan jalpy ulttyq jobalar júzege asyrylýda. Qazirgi kúni memlekettik qoldaýdyń nátıjesinde, óńirimizde baspana kezeginde turǵandar, turǵyn úı qurylys jınaq júıesiniń qatysýshylary, sondaı-aq kópbalaly otbasylar men halyqtyń áleýmettik-osal toptary úshin 23 jalǵa beriletin jáne 11 kredıttik turǵyn úı salynýda. 2020 jyly 183 otbasy «Baqytty otbasy» baǵdarlamasy boıynsha qoljetimdi turǵyn úıge ıe boldy», – dedi Aına Mysyrálimova.

Aıta keteıik, búgingi tańda oblysta 15 myńnan astam kóp balaly otbasy turady. Onyń 5,8 myńy «Kúmis Alqa» jáne «Altyn Alqa» belgilerimen marapattalǵan kóp balaly otbasylar.

Olardyń qatarynda áýlettiń muǵalimdik eńbek ótili 348 jyldan asqan Qudabaevtar, eńbek ótilderi 155 jyldy quraıtyn dárigerler áýleti Rodındar otbasy, temirjolshylar áýleti Qasenovter, júrgizýshiler áýleti – Ageevter, kópbalaly Shotbekter otbasylary bar.