Aqmola oblysynda óndiriletin qoıan eti Astanada saýdalanady
KÓKShETAÝ. QazAqparat - Tselınograd aýdanyndaǵy qoıan ósirýmen aınalysatyn kásiporyndardyń ónimine Astana meıramhanalary men dámhanalarynan suranys kóp túsedi, dep habarlaıdy QazAqparat tilshisi.
Qoıan ósirýmen aınalysatyn «Astana Mıkro» asyl tuqymdy sharýashylyq» JShS-i 2012 jyly qurylǵan bolatyn. Alǵashynda Reseıdiń Novosibir qalasynan jáne Ońtústik Qazaqstan oblysynan 70 analyq jáne 10 atalyq qoıan satyp ákelingen.
Seriktestik basshylarynyń aıtýynsha, mundaı jańa joba naryqtaǵy suranys jan-jaqty eskerilip, zerttelgen soń ǵana qolǵa alynǵan kórinedi. Qazirgi kezde, munda «Keńestik shınshılla», «Kúmisteı», «Aq alyp» asyl tuqymdy qoıandardyń sany 1520 jetken. Onyń jartysyna jýyǵy analyq qoıandar. Degenmen, sońǵy kezderi qoıan etine degen suranys azaıyp ketken.
«Іri qara etimen salystyrǵanda qoıan etinniń baǵasy qymbattaý bolǵanymen jeńsik as. Sondyqtan, qoıan etine suranys azaıǵanymen turaqty tutynýshylarymyz arqyly ǵana paıda taýyp otyrmyz. Olardyń arasynda Astana qalasyndaǵy birqatar meıramhanalar men dámhanalar, saýda oryndary jáne dúkenderi bar. Ótken jyly barlyǵy 4 tonnadan astam qoıan etin óndirdik. Osy kúni qurama jem zaýytyn salyp, paıdasyn kórip jatyrmyz. Aldaǵy ýaqytta qoıandardyń sanyn arttyrý josparda bar. Ol úshin bizde barlyq múmkindikter qarastyrylǵan», - deıdi seriktestik bas zootehnıgi Meıram Əbishev.
