Aqmola oblysynda óńdeýshi ónerkásipke salynatyn ınvestıtsııa deńgeıi qandaı

NUR-SULTAN. QazAqparat – Jyl sońyna deıin Aqmola oblysynda 150 mlrd teńgeden astam ınvestıtsııaǵa 23 joba iske qosylady. Bul týraly óńir ákimi Ermek Marjyqpaev málim etti, dep habarlaıdy QazAqparat tilshisi.

«Óńdeýshi ónerkásipke ınvestıtsııalar ósiminiń qarqyny saqtalyp otyr. Bıylǵy 5 aıda 17 mlrd-tan astam teńge ınvestıtsııalandy. Bul turǵyda ótken jylǵy deńgeıge qaraǵanda bir jarym ese ósim boldy. Investorlar jyl sońyna deıin 150 mlrd teńgeden astam ınvestıtsııaǵa 23 jobany iske qosady dep josparlanyp otyr. Onyń jartysy azyq-túlik ónerkásibi jobalary», - dedi E. Marjyqpaev Ortalyq kommýnıkatsııalar qyzmetinde.

Onyń aıtýynsha, osynyń arasyndaǵy eń iri jobalardyń biri – ol «Aq Dala Agronyń» jylyna 6 myń tonna qýaty bar qus fabrıkasynyń qurylysy. Aldaǵy ýaqytta ónim shyǵarý qýaty 15 myń tonnaǵa jetkizilmek. Sonymen qatar, aýyl sharýashylyǵy mashına qurylysynda mańyzdy jobalar júzege asyrylyp jatyr.

«Qurylys ındýstrııasy da tabysty damyp keledi. Kirpish óndirisiniń kólemi 10 eseden astam deńgeıde ósti (2010 jyldan beri). Zerendi aýdanynda taǵy bir kirpish zaýyty ashylady, onda jylyna 22 mln kirpish shyǵarylady. Sonymen qatar, Arshaly aýdanynda iri kirpish zaýytynyń qurylysy bastaldy. Onyń qýaty jylyna 120 mln kirpish bolady. Zaýyt aldaǵy jyly iske qosylady. Osy jobalar eki jyl ishinde óńirdegi qurylys kirpishine degen suranysty tolyq jabady», - dedi ákim.