Aqmola oblysynda omıkron shtamyn anyqtaý úshin 30-ǵa jýyq synama zerttelýde
KÓKShETAÝ. QazAqparat – Aqmola oblysynda «omıkron» shtamyn anyqtaý úshin 30-ǵa jýyq synama zerthanaǵa jiberildi. Bul týraly oblystyq densaýlyq saqtaý basqarmasynyń basshysy Narıman Syzdyqov aıtty, dep habarlaıdy QazAqparat tilshisi.
«Aqmola oblysynyń aýmaǵynda «omıkron shtamyn anyqtaıtyn zerthana joq. Sondyqtan bul bıomaterıaldar ortalyqtan tıisti mekemege jiberiledi, onda egjeı-tegjeıli zertteý júrgiziledi», - dep túsindirdi N.Syzdyqov.
Basqarma basshysy atap ótkendeı, búgingi kúni oblysta «omıkron» shtammy belgileri baıqalǵan 30-ǵa jýyq synama alyndy. Olar zerthanaǵa jiberilip, nátıjeleri kútilýde.
«Biz óńirdegi keıbir koronavırýstyń klınıkalyq jaǵdaılary «omıkron» shtammyna uqsastyǵyn baıqap otyrmyz. PTR-dıagnostıkada «omıkron» shtamyn anyqtaý qarastyrylmaǵan, sondyqtan qosymsha zertteýler qajet», - dep tolyqtyrdy N.Syzdyqov.
Onyń sózinshe, Aqmola oblysynan alynǵan «omıkron» shtamy bar synamalardy zertteý qorytyndysy osy aptanyń sońynda jarııalanatyn bolady.
