Aqmola oblysynda oqýshyny soqqyǵa jyqqan burynǵy ákimge aıyppul salyndy
KÓKShETAÝ. QazAqparat - Jasóspirimdi soqqyǵa jyqty dep aıyptalǵan Qorǵaljyn aýyldyq okrýginiń burynǵy ákimine sot 15 AEK (36075 teńge) mólsherinde aıyppul saldy, dep habarlaıdy QazAqparat.
Qorǵaljyn aýdandyq sotynyń qaýlysymen 8-synyp oqýshysy Dıas Muqandy soqqyǵa jyqty dep aıyptalǵan aýyldyq okrýgtiń burynǵy ákimi Janat Omarov QR Ákimshilik quqyqbuzýshylyq týraly kodeksiniń 73-1-baby, 1-bóliginde («Densaýlyqtyń qysqa merzimge buzylýyna nemese jalpy eńbek qabiletin turaqty túrde bolmashy joǵaltýǵa ákep soqqan, densaýlyqqa qasaqana jeńil zııan keltirý») kórsetilgen ákimshilik quqyqbuzýshylyqty jasady dep tanyldy.
«Oǵan 15 AEK (1 AEK - 2405 teńge) mólsherinde aıyppul salyndy. Qaýly zańdy kúshine engen joq. Taraptar oǵan 10 kún ishinde jazbasha shaǵymdanýyna bolady», - dep málimdedi Aqmola oblystyq sotynyń baspasóz qyzmeti.
Eske sala keteıik, Aqmola oblysynda 8-synyp oqýshysyn soqqyǵa jyqqan Qorǵaljyn aýyldyq okrýginiń ákimi Janat Omarovtyń ústinen is qozǵalǵan bolatyn.
Dárigerler balanyń dıagnozy týraly: «mı shaıqalǵan, ıyq býyndary men beldiń jumsaq tini jaralanǵan, bes aýmaǵy jaralanǵan. Qazirgi ýaqytta balanyń jaǵdaıy ortasha-kúrdeli, ómirine eshteńe qaýip tóndirip turǵan joq. Tomografııa qorytyndysyna sáıkes, bas mıy jaǵynan qan quıylýy nemese jaraqat alý jaǵdaıy joq», - degen bolatyn.
Aqmola oblystyq ІІD baspasóz qyzmetiniń málimdeýinshe, balanyń densaýlyǵyna jeńil zııan keltirilgen. 2017 jyly «Densaýlyqqa qasaqana jeńil zııan keltirý» baby qylmystyq bap qatarynan alynyp, ákimshilik quqyqbuzýshylyqtar qataryna jatqyzylǵan bolatyn. Sondyqtan burynǵy ákimge qatysty qylmystyq is toqtatylyp, QR Ákimshilik quqyqbuzýshylyq týraly kodeksiniń 73-1-babynyń 1-bóligine sáıkes ákimshilik hattama toltyrylǵan.
