Aqmola oblysynda oqýshy ulǵa seksýaldyq zorlyq-zombylyq jasalǵan

KÓKShETAÝ. QazAqparat - Aqmola oblysynyń Býrabaı aýdanyndaǵy aýyl mektepteriniń birinde kámelettik jasqa tolmaǵan uldyń seksýaldyq sıpattaǵy zorlyq-zombylyqqa ushyraǵany týraly daý shyqty. Bul týraly jergilikti turǵyn áleýmettik jelide jazdy, dep habarlaıdy QazAqparat tilshisi.

«Tamyz aıynda bizdiń aýylda bir jyl buryn jasalǵan aýyr qylmys jarııa boldy. Besinshi synyp oqýshysy joǵary synyp oqýshylarynyń jynystyq zorlyq-zombylyǵyna ushyrady (olardyń biri qazir stýdent). Bul oqıǵa búkil aýyldy dúrliktirdi...», - dep jazdy turǵyn.

Sonymen birge, jazbanyń avtory kúdiktilerdiń biri mektepte 11-synypta oqıtynyn, al bireýiniń anasy sol mektepte muǵalim ekenin aıtady. Onyń sózinshe, bul oqıǵa zardap shekken balanyń anasy aýyl turǵyndarynyń jelidegi chatyna jazǵan jazbadan keıin belgili bolǵan.

«Býrabaı aýdany ákiminiń orynbasary J.M.Tólegenovtiń, Býrabaı aýdanynyń ishki ister organdary, prokýratýra, ýchaskelik prokýratýra ókilderiniń qatysýymen bizdiń aýyl ákimdiginde jınalys ótti. Onda aýyl turǵyndaryna bolǵan jaǵdaı týraly túsinik berildi. Ata-analardyń ótinishi boıynsha tergeý sharalary kezinde kúdikti qashyqtan oqytýǵa aýystyryldy. Іs prokýratýranyń baqylaýynda», - dep jazdy er adam óziniń ekinshi jazbasynda.

Aqmola oblystyq PD baspasóz qyzmetinen túsindirgendeı, qazirgi kezde Býrabaı aýdandyq Polıtsııa bólimi tarapynan kámeletke tolmaǵan balaǵa qatysty seksýaldyq sıpattaǵy zorlyq-zombylyq deregi boıynsha tergeý amaldary qolǵa alynǵan.

«Jábirlenýshi taraptyń aryzy boıynsha bul oqıǵa 2022 jyldyń maýsym aıynda bolǵan. Qazirgi ýaqytta saraptama taǵaıyndaldy, oqıǵanyń mán-jaıy anyqtalýda. Qylmystyq protsessýaldyq kodekstiń 201-babyna sáıkes ózge aqparat jarııalaýǵa jatpaıdy», - dep túsindirdi QazAqparat tilshisiniń saýalyna PD baspasóz qyzmetinen.

Aıta ketsek, budan buryn Aqmola oblysynda ákimniń turǵyndy urǵany týraly jazǵan edik.