Aqmola oblysynda oqý jylyn 128 myń oqýshy bitirdi
KÓKShETAÝ. QazAqparat - Aqmola oblysynda oqý jylyn 128 myń oqýshy bitirdi. Sońǵy qońyraý sharasy onlaın rejımde ótti, dep habarlaıdy QazAqparat tilshisi.
Óńirde oqý jylyn aıaqtaǵan oqýshylarǵa aımaq basshysy Ermek Marjyqpaev áleýmettik jelidegi paraqshasy arqyly quttyqtaý tilegin bildirdi.
«Barshańyzdy kezekti oqý jylynyń sátti aıaqtalýymen quttyqtaımyn! Búgin sizder taǵy bir belesti baǵyndyryp, jańa kezeńge aıaq bastyńyzdar. Osy qýanyshty sizdermen bóliskim kelip otyr.
Taǵy bir oqý jyly artta qaldy. Búgin búkil respýblıka boıynsha barlyq mektepterde onlaın formatta sońǵy qońyraý ótkizilip jatyr. Bilim alýdaǵy jumsaǵan kúsh-qýat, atqarǵan eńbekterińiz sizderge laıyqty jemisin beredi degen senimdemin», - deı kele, Ermek Marjyqpaev búkil dúnıejúzine tarap otyrǵan pandemııanyń elimizdiń bilim júıesi úshin qıyndyqtar týǵyzyp otyrǵandyǵyn atap ótti.
«Osyndaı qıyn jaǵdaıda sońǵy oqý toqsany mektepterde erekshe formatta ótti. Jumys aýqymy pedagogtar men oqýshylar úshin ǵana emes, ata-analarǵa da kóbeıdi. Sizder ózara qarym-qatynastyń jańasha sapasyn jolǵa qoıyp, bilim berý men bilim alýdyń jańasha ádistemelerin ıgerip, zamanaýı tehnologııalardy qoldaný arqyly oqytýdyń daǵdylaryn meńgere aldyńyzdar dep senemin!»,- dep tolyqtyrdy Ermek Marjyqpaev.
Aımaq basshysy atap ótkendeı, búgingi kúni oblysta oqý jylyn 128 myń oqýshy bitirip jatyr.
Eske sala keteıik, osyǵan deıin habarlaǵanymyzdaı, bıyl Aqmola oblysynda 4515 oqýshy mektep bitiretin bolsa, onyń 297-i - Altyn belgi ıegeri, 187-i - bilim ordasyn úzdik attestatpen aıaqtaǵaly otyr. Mektep bitirýshi 4515 túlektiń 3718-i nemese mektep bitirýshilerdiń 82,3 paıyzy UBT tapsyrýǵa ótinish bergen bolatyn. Al, oblystaǵy mektep bitirýshi túlekterdiń sońǵy qońyraý saltanatyn attestat tapsyrý rásimimen birge 3-4 maýsym aralyǵynda ótkizý josparlanǵan.
