Aqmola oblysynda obyrǵa shaldyqqan áıelder sany azaıdy
KÓKShETAÝ. QazAqparat - Aqmola oblysynda sút bezi obyryna shaldyqqandardyń sany azaıyp keledi, dep habarlaıdy QazAqparat tilshisi.
«Áleýmettik medıtsınalyq saqtandyrý qory» oblystyq fılıalynyń málimetterine qaraǵanda, 2015 jyly sút beziniń obyryna shaldyǵý oqıǵasy 226 bolsa, bıylǵy jyldyń basynan beri bul kórsetkish 28 paıyzǵa kemigen. Máselen, 2016 jyly - 220, 2017 jyly - 176 oqıǵa tirkelgen.
«Aqmola oblysyndaǵy áıelderdiń sút beziniń obyry jáne jatyr obyry sııaqty onkologııalyq aýrýlarǵa shaldyǵý deńgeıi turaqty. 2015 jyly jatyr obyryna qatysty 74 oqıǵa tirkelse, 2016 jyly - 85, 2017 jyly - 72. Al, 2018 jyly 40 jáne 79 jas aralyǵyndaǵy 73 áıel tirkeldi», - dep túsindirdi fılıaldyń sarapshysy Shanhı Golýbeva.
Aıta keteıik, búgingi tańda Qazaqstanda atalmysh aýrýdy aldyn alý maqsatynda áıelderdiń jyl saıyn tegin tekserýden ótýine múmkindik bar.
«Tegin medıtsınalyq kómektiń kepildendirilgen kólemi (TMKKK) sheńberinde 40-70 jas aralyǵyndaǵy buryn aýyrmaǵan áıelder jylyna eki ret tegin skrınıngten ótýine bolady. Al, jatyr obyry boıynsha dıspanserlik esepte turmaǵan 30-70 jas aralyǵyndaǵy áıelder bolsa, 4 jylda bir ret tegin tekseristen óte alady. Oǵan qosa, osy jastaǵy áıelder turǵylyqty jeri boıynsha tirkelgen emhanada óz erkimen skrınıgten ótýine bolady», dep tolyqtyrdy vedomstvodan.
Sonymen qatar, júkti jáne kópbalaly analar jynystyq qatynas arqyly juǵatyn ınfektsııalardy PTsR ádis arqyly tegin analız tapsyra alady.
Eske sala keteıik, eger qazaqstandyqtar, onyń ishinde aqmolalyqtar mekenjaıy boıynsha medıtsınalyq kómek alatyn emhanalar unamasa, onda olar «Áleýmettik medıtsınalyq saqtandyrý qorynyń» turǵyndardy tirkeý naýqany sheńberinde ózge emhanaǵa tirkele alady. Tirkeý naýqany qyrkúıektiń 15-nen bastalyp, qarashanyń 15-de aıaqtalady.
