Aqmola oblysynda naýqas balalardy ońaltý qalaı júzege asyrylady

KÓKShETAÝ. QazAqparat - Aqmola oblysynda naýqas balalardy ońaltý sharalary qalaı júzege asyrylýda? Bul týraly oblystyq densaýlyq saqtaý basqarmasy basshysynyń mindetin atqarýshy Bıbigúl Omarova málim etti, dep habarlaıdy QazAqparat tilshisi.

Basqarma basshysynyń aıtýynsha, 2022 jyldyń 10 qańtarynan Aqmola oblystyq kópsalaly balalar aýrýhanasynyń bazasynda «Qamqorlyq» ońaltý ortalyǵy jumysyn bastady. Mekeme ortalyq jáne perıferııalyq júıke júıesi, mı men julynnyń týabitti aqaýlary bar balalarǵa arnalǵan. Ońaltý ortalyǵyna bir mezette 50 bala keledi. Munda bıylǵy 10 aıda 444 bala em-dom aldy. Jalpy jyl sońyna deıin 600 balany ońaltý josparlanǵan.

«Stepnogor kópsalaly qalalyq aýrýhanasynyń bazasynda 2022 jyldyń aqpan aıynda erte jastaǵy balalardy (úsh aıdan úsh jasqa deıin) medıtsınalyq-áleýmettik ońaltý jáne pedagogıkalyq túzetý úshin erte aralasý ortalyǵy ashyldy. Táýlik boıy jáne kúndizgi statsıonar jaǵdaıynda úshinshi kezeńdegi medıtsınalyq ońaltý júrgiziledi. Qazirgi ýaqytta táýlik boıy 2 jáne kúndizgi 16 tósek oryn ornalastyrylǵan. Óńirde tirek-qımyl apparaty buzylǵan 540 bala, al tserebraldy sal aýrýy dıagnozymen 504 bala esepte tur», - deıdi Bıbigúl Omarova.

Sonymen birge basqarma basshysy atap ótkendeı, óńirde memlekettik-jekeshelik áriptestik damytylýda. Máselen, «Viamedis» JShS memlekettik-jekeshelik áriptestik sheńberinde 1,12 mıllıard teńgege emhanasy bar jańa klınıkalyq-ońaltý ortalyǵynyń qurylysyn júzege asyrdy. Emhana 2 aýysymda 500 adamdy qabyldaı alady.

«Ortalyq tirkelgen halyqqa, sondaı-aq qala men oblys turǵyndaryna tegin medıtsınalyq kómektiń kepildi kólemi jáne mindetti álýemettik medıtsınalyq saqtandyrý sheńberinde statsıonarlyq, zerthanalyq, profılaktıkalyq, áleýmettik jáne psıhologııalyq, hırýrgııalyq jáne terapevtik kómek usynady. Budan bólek, sáýlelik jáne fýnktsıonaldy dıagnostıka, kompıýterlik tomografııa jáne magnıtti dıagnostıka boıynsha alǵashqy medıtsınalyq-sanıtarlyq jáne konsýltatsııalyq-dıagnostıkalyq qyzmet kórsetedi. Rezonanstyq tomografııa, kúndizgi statsıonar jáne úıdegi statsıonar, qalpyna keltirý boıynsha emdeý jáne medıtsınalyq ońaltý tárizdi qyzmetter qarastyrylǵan», - dep tolyqtyrdy Bıbigúl Omarova.

Ortalyqta statsıonardy almastyratyn kómek kórsetý úshin 46 tósektik kúndizgi statsıonar uıymdastyrylady. Dıagnostıkalyq zertteýler júrgizý úshin klınıkalyq-dıagnostıkalyq zerthana, KT, MRT jáne tsıfrlyq rentgen sáýlelik dıagnostıka bólimshesi jumys isteıtin bolady.

Aıta ketsek, Aqmola oblysynda alǵashqy medıtsınalyq-sanıtarlyq kómek kórsetetin 38 nysan salynady.