Aqmola oblysynda naýqas aýrýhanaǵa jetý úshin qutqarýshylardyń kómegine júgindi
KÓKShETAÝ. QazAqparat - Aqmola oblysynyń Býrabaı aýdanynda naýqas aýrýhanaǵa jetýi úshin qutqarýshylardyń kómegine júgindi, dep habarlaıdy QazAqparat tilshisi aýmaqtyq Tótenshe jaǵdaılar departamentiniń baspasóz qyzmetine silteme jasap.
Vedomstvonyń málimeti boıynsha, 2019 jyly 6 aqpanda TJD Biryńǵaı kezekshi-dıspetcherlik qyzmetine K.Qaıyrov esimdi turǵyn telefon arqyly habarlasyp, Jańa Qarabaýyr aýylynyń 1950 jylǵy turǵynyn shuǵyl túrde Býrabaı aýdanynyń ortalyq aýdandyq aýrýhanasyna jetkizý qajettigi týraly aıtyp, kómek suraǵan.
«Óńirde qalyptasqan aýa-raıy jaǵdaılaryna baılanysty turǵyndardyń (boran, burqasyn, qatty aıaz) ózdiginen aýdan ortalyǵyna qatynaýǵa múmkindigi joq. Sol sebepti, dereý saǵat 11:58 mınýtta apatty-qutqarý jumystaryna TJD «Jedel-qutqarý jasaǵy» MM jeke quramynan 2 adam jáne 1 birlik «Trekol» tehnıkasy men Abylaıhan aýyldyq okrýginiń feldsherlik ambýlatorlyq pýnktinen 2 adam jumyldyryldy.
Nátıjesinde, araǵa birneshe saǵat salyp, kúndizgi saǵat 14:50 shamasynda naýqas adam júrektiń ıshemııalyq aýrýy dıagnozymen Şýchınsk qalasynyń «Býrabaı Avıtsena» JShS Ortalyq aýdandyq aýrýhanasyna jetkizildi», deıdi TJD baspasóz qyzmetindegiler.
Eske sala keteıik, osyǵan deıin habarlaǵanymyzdaı ótken táýlikte Aqmola oblysynda jolda qalǵan 224 adam qutqarylǵan bolatyn.
