Aqmola oblysynda múmkindigi shekteýli jandar úshin 475 áleýmettik nysan tolyǵymen beıimdeldi

ASTANA. QazAqparat - Múgedektigi bar adamdardyń zańdy quqyqtaryn qamtamasyz etý sheńberinde Aqmola oblysynda 667 áleýmettik ınfraqurylym obektileri beıimdeldi. Onyń ishinde 475 obekt erekshe qajettilikteri bar adamdardyń barlyq sanattaryna tolyqtaı yńǵaıly etip jasaldy, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.

Budan buryn habarlanǵandaı, elimizde 2025 jylǵa deıin Qazaqstan Respýblıkasynda múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospar, «Amanat» partııasynyń Jol kartasy jáne jáne 2021 jyly Memleket basshysynyń tapsyrmasy boıynsha ázirlengen «Kedergisiz keleshek» jobasy iske asyrylýda.

Joba aıasynda el aýmaǵynda beıimdelýi tıis 22 myń basym obekt anyqtaldy. 2021 jyldan bastap 2025 jylǵa deıin jyl saıyn osyndaı talapqa 4400 obekt saı kelýi qajet. Al bıylǵy jyldyń 1 shildesindegi jaǵdaı boıynsha 9 128 obekt beıimdeldi.

Aqmola oblysynda 5 jyl ishinde múgedektigi bar adamdardyń barlyq sanattary úshin 1294 obektini beıimdeý kózdelgen. Qazirgi ýaqytta 2021-2023 jyldar aralyǵynda beıimdelýge josparlanǵan 776 obektiniń 667-inde jergilikti atqarýshy organdar beıimdeý sharalaryn júrgizdi.

Eńbekmıni Eńbek jáne áleýmettik qorǵaý komıtetiniń Aqmola oblysy boıynsha aýmaqtyq departamenti (budan ári – Departament) júrgizgen baqylaýdan keıingi tekserýler barysynda atalǵan 475 nysannyń 308-iniń tolyq beıimdelgeni rastaldy.

Máselen, óńirde múgedektigi bar adamdardyń barlyq sanattary úshin qol jetimdi:

- memlekettik mekemeler – 104 (77 ákimdik, 13 jergilikti atqarýshy organdardyń basqarmalary, 6 basqarma, 1 departament, 2 aýdandyq sot, 5 arnaýly áleýmettik qyzmet kórsetý ortalyǵy.);

- densaýlyq saqtaý obektileri – 66 (13 aýrýhana, 7 emhana, 1 medıtsınalyq pýnkt, 31 dárigerlik ambýlatorııa, 5 dárigerlik ambýlatorııa, 9 medıtsınalyq pýnkt);

- bilim berý obektileri – 171 (135 mektep, 13 balabaqsha, 14 kolledj, 2 túzetý kabıneti, 2 mýzyka mektebi, 4 ýnıversıtet ǵımaraty, 1 oqý-óndiristik kombınaty);

- mádenıet obektileri – 52 (27 mádenıet úıi, 3 murajaı, 2 muraǵat, 4 kitaphana, 1 teatr, 1 demalys ortalyǵy, 12 aýyldyq klýb, 2 shyǵarmashylyq úıi);

- sport nysandary – 9 (1 sport saraıy, 8 sport mektepteri men keshenderi);

- qyzmet kórsetý salasynyń basqa obektileri – 73 (10 bank fılıaly, 11 halyqqa qyzmet kórsetý ortalyǵy, 5 poshta bólimshesi, 21 saýda úıi, dúkender, 9 dárihana, 1 stomatologııa, 5 vokzal jáne t.b.).

192 obekt ishinara beıimdelgen dep tanyldy, olar boıynsha 276 buzýshylyq anyqtaldy: estý qabileti buzylǵan adamdar úshin – 36; kórý qabileti buzylǵan adamdar úshin – 111; tirek-qımyl apparaty buzylǵan adamdar úshin – 42, kreslo-arbamen qozǵalatyn adamdar úshin – 87.

Jergilikti atqarýshy organdarǵa beıimdeý is-sharalaryn aıaqtaý maqsatynda anyqtalǵan eskertýlerdi joıý boıynsha usynystar berildi.

Sondaı-aq, 2023 jyldyń sońyna deıin taǵy 109 obektini beıimdeý josparlanýda.

Sonymen qatar, memlekettik baqylaý aıasynda Departamentpen áleýmettik ınfraqurylym nysandaryna 32 tekserý júrgizildi, onyń ishinde 25 profılaktıkalyq baqylaý, ótinish negizinde jáne tapsyrmalardyń oryndalýyn baqylaý maqsatynda jospardan tys 7 tekserý júrgizildi.

Tekserýlerdiń qorytyndysy boıynsha anyqtalǵan buzýshylyqtardy joıý týraly 25 uıǵarym berildi, 2,4 mln teńgeden astam somaǵa 2 ákimshilik aıyppul salyndy.

Obektilerdiń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde olardy ákimshilik jaýapkershilikke tartpaı, joıý týraly nusqamalar ǵana beriletinin atap ótý qajet. Nusqama belgilengen merzimde oryndalmaǵan jaǵdaıda aıyppul salynady.