Aqmola oblysynda múgedek jan óz bıznesin ashty
KÓKShETAÝ. QazAqparat-Aqmola oblysynyń Jarqaıyń aýdanynda qaıta óndirýge jaraıtyn shıkizattardy qabyldaıtyn arnaıy qoıma jumys istep tur. Ony DTsP dıaznogy bar, 2 toptaǵy múgedek Sergeı Prıvalov ashyp, búginde óz isin dóńgeletip otyr, dep habarlaıdy QazAqparat tilshisi «Nur Otan» partııasy Aqmola oblystyq fılıalynyń baspasóz qyzmetine silteme jasap.
Densaýlyǵyndaǵy kináratyna qaramastan Sergeı bala kúninen alǵyr bolyp ósken. Mektepti úıde oqyp júrip aıaqtaǵan soń, kolledjden baǵdarlamashy mamandyǵyn alyp shyqty. Keıin ata-anasy men dostarynyń qoldaýynyń arqasynda Derjavınsk qalasynda kishigirim qoımany jalǵa alyp, karton qaǵazdary, plastık bótelkeleri men temir ydystardy jınaıtyn oryn ashty. Qoımada otyryp qana qoımaı, qala ishin aralap, shıkizat izdeýge kiristi. Jınalǵan qarajatyna velosıped satyp alyp, oǵan arnaıy jáshikter ornatty.
Ótken jyldyń kúzinde «Nur Otan» partııasynyń Jarqaıyń aýdandyq fılıalyna kómek surap kelgen Sergeıge partııalastar qol ushyn sozyp, qajetti qujattardy jınastyryp, qoımany senimgerlik basqarýǵa alýǵa kómektesti. Qoımada búgingi kúni Sergeı allıýmınıı ydystardy, plastık, shyny bótelkeler men qaǵaz qaldyqtaryn jınaýda.
«Sergeı óz isin karton jınaýdan bastaǵan. Partııanyń kómegimen qujat jınaýǵa kómektestik. Oblys ortalyǵyna shıkizat jóneltýde qıyndyq kórip otyr. Bul másele de sheshimin tabady dep senemiz»,- deıdi aýdandyq partııa fılıalynyń konsýltanty, aýdan ákiminiń múgedekter máselesi boıynsha keńesshisi Ádil Nurbekov.
Búgingi kúni Sergeı «Bastaý- bıznes» baǵdarlamasyna qujattaryn tapsyryp qoıǵan. Oqyp, nesıe alyp, bıznesin keńeıtsem degen nıette.
«Qoqys óńdeıtin tseh ashsam deımin. Aınalanyń barlyǵy shashylǵan qoqys. Ony qaıta óńdeýden ótkizip, qurylys zattaryn shyǵarý oıda bar»,- dep óz josparymen bólisti Sergeı.
Sergeı búginde qol qýsyryp otyrǵan jan emes. Qatarlastarynan kem qalmaı joba jazyp, grant alyp, bıznesin keńeıtpekshi.
