Aqmola oblysynda muǵalimder kúnine arnalǵan quttyqtaý onkúndigi ótýde
Oblystyq bilim basqarmasy baspasóz qyzmetiniń málimetinshe, atalmysh shara pedagog (muǵalim, tárbıeshi) mamandyǵynyń bedelin arttyrýǵa, pedagogtardyń óz oqýshylarynan, olardyń ata-analarynan, áriptesterinen alǵys alatyndaı erekshe merekelik orta qalyptastyrýǵa baǵyttalǵan.
«Beınerolıkter, pedagogtarmen jáne oqýshylarmen suhbat, pedagogtar áýletteri ókilderimen onlaın-kezdesýler, pedagogtardyń, tabysty túlekterdiń, pedagogıkalyq eńbek ardagerleriniń qatysýymen telehabarlar toptamasy, gazetterdiń arnaıy shyǵarylymdary josparlanǵan.
Mereke qarsańynda barlyq mektepterde zamanaýı álemdegi tereń bilim men básekelestik quzyrettiliktiń mańyzdylyǵyna nazar aýdara otyryp, «Táýelsizdik jetistikteri» taqyrybymen ashyq sabaqtar ótkiziledi», - dedi vedomstvodan.
Budan bólek, QR Táýelsizdiginiń 30 jyldyǵy men kórnekti qazaq aǵartýshysy, jańashyl pedagog Ybyraı Altynsarınniń 180 jyldyǵyn merekeleý aıasynda «Qazirgi bilim berýde Y.Altynsarınniń pedagogıkalyq ıdeıalary» atty ǵylymı – tájirıbelik konferentsııa ótti. Sondaı-aq mektep oqýshylaryn, kolledj stýdentterin, ata-analardyń qatysýymen «Altynsarın murasy-máńgiliktiń ıgiligi» atty synyptan tys taqyryptyq is-sharalar ótkizilýde.
Aqmola oblysy bilim basqarmasynyń Instagram áleýmettik jelisinde bilim berý uıymdarynyń Ybyraı Altynsarınnyń 180 jyldyǵyna arnalǵan chellendji iske qosyldy. Onda oqýshylar men muǵalimder uly muǵalimniń shyǵarmalaryn oqıdy.
«Úzdik pedagog – 2021» baıqaýynyń jeńimpazdary áleýmettik jeliler, BAQ arqyly marapattalady. Bilim berý uıymdarynda chellendjder jáne beınequttyqtaýlar baıqaýy ótedi.
Onkúndik 2021 jyldyń 1 qazanynda «Bolashaq saraıy» saraıynda ótetin Muǵalimder kúnine arnalǵan saltanatty jınalyspen aıaqtalady.
