Aqmola oblysynda mototsıkl mingen áıel men er adam jol apatynan kóz jumdy

KÓKShETAÝ. QazAqparat – Aqmola oblysynda mototsıkl júrgizýshisi men jolaýshysynyń jol apatynan kóz jumýyna baılanysty sotqa deıingi tergeý amaldary júrgizilip jatyr, dep habarlaıdy QazAqparat tilshisi.

Oblystyq polıtsııa departamenti baspasóz qyzmetiniń málimetinshe, 11 tamyzda Tselınograd aýdandyq polıtsııa bólimine patrýldik polıtsııa rotasynyń qyzmetkeri habarlasady. Ol Qarameńdi batyr men Araıly aýyldary arasynda, «Ekaterınbýrg – Almaty» avtojolynyń 1212-shaqyrymynda Aqtóbe qalasynyń 32 jastaǵy turǵyny «Toyota Estima» avtokólimen «Raser» mototsıklin qaǵyp ketkenin aıtqan.

«Jol apatynan mototsıkl júrgizýshisi – Jańaesil aýylynyń 25 jastaǵy turǵyny men onyń jolaýshysy – Novoıshımka aýylynyń turǵyny, 25 jastaǵy áıel oqıǵa ornynda kóz jumdy. Qazirgi kezde osy oqıǵaǵa baılanysty Qylmystyq kodekstiń 345-baby 4-bóligi (kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) boıynsha sotqa deıingi tergeý bastaldy. Polıtsııa qyzmetkerleri jol-kólik oqıǵasynyń barlyq mán-jaılaryn anyqtap jatyr. Qajetti saraptamalar taǵaıyndaldy», - dedi vedomstvodan.

Aıta ketsek, 2022 jyldyń basynan beri oblysta Ákimshilik quqyqbuzýshylyq týraly kodekstiń 593-baby (QR jolaýshylardy tasymaldaý talaptaryn saqtamaý) boıynsha 11 myńnan astam quqyq buzýshylyq anyqtaldy. Sondaı-aq, mas kúıinde kólik quralyn júrgizgeni úshin 2 106 ákimshilik hattama toltyrylǵan.

Eske sala keteıik, Aqmola oblysynda jol apatynan zeınetker kóz jumǵan bolatyn.