Aqmola oblysynda menıngokokk juqpasy boıynsha epıdemıologııalyq jaǵdaı turaqty
KÓKShETAÝ. QazAqparat - Aqmola oblysynda menıngokokk juqpasy boıynsha epıdemıologııalyq jaǵdaı turaqty. Bul týraly Aqmola oblysy qoǵamdyq densaýlyq saqtaý departamentiniń basshysy Azamat Dúısenov málim etti, dep habarlaıdy QazAqparat tilshisi.
Departament basshysynyń aıtýynsha, oblysta menıngokokk juqpasy boıynsha epıdemıologııalyq jaǵdaı dárigerlerdiń baqylaýynda. Epıdemııaǵa qarsy jáne profılaktıkalyq sharalar turaqty túrde júrgizilip turady.
«Jyl basynan beri oblys boıynsha eresekter arasynda 1 menıngokokk juqpasy tirkeldi. Anyqtalǵan jaǵdaılar boıynsha oshaqtarda epıdemııaǵa qarsy jáne profılaktıkalyq is sharalar júrgizildi. Naýqaspen qarym - qatynasta bolǵandar sany anyqtalyp, barlyǵy medıtsınalyq tekseristen ótkizildi. Olardyń arasynda menıngokokk bakterııalaryn tasymaldaýshylar anyqtalǵan joq», - dep túsindirdi Azamat Dúısenov.
Áıtse de búgingi tańda merzimdik aınalymǵa sáıkes Almaty oblysynda menıngokokk juqpasynyń jaǵdaılary tirkeldi. Sol sebepti, departament basshysy búgingi kúni osy juqpaǵa kóńil aýdarý qajettigin aıtýda.
Eske sala keteıik, menıngokokk juqpasy antroponoz syrqattaryna jatady. Juqpa kózi - syrqattanýshy nemese bakterııa tasymaldaýshy. Taralý joly aýa, tamshy arqyly, naýqas nemese tasymaldaýshymen jaqyn qatynasta bolǵan jaǵdaıda juǵady.
Menıngokokk juqpasynyń klınıkasy jiti vırýsty ınfektsııasyna sáıkes keledi: deneniń qyzýy 39-40 °C deıin kóteriledi, tamaqtyń aýrýy, jybyrlaýy paıda bolady, muryn qabynady. Denege bórtpeler shyǵady.
