Aqmola oblysynda memlekettik organ ǵımaratyn órtemek bolǵandar izdestirilip jatyr
KÓKShETAÝ. QazAqparat - Aqmola oblysynyń Arshaly aýdanynda memlekettik organ ǵımaratyn órtemek bolǵandar izdestirilip jatyr, dep habarlaıdy QazAqparat tilshisi.
Oblystyq polıtsııa departamenti baspasóz qyzmetiniń málimetinshe, sáýirdiń 19-da Arshaly aýdandyq polıtsııa bólimine jergilikti atqarýshy organ qyzmetkeri habarlasyp, belgisiz bireýlerdiń saǵat 03:30 shamasynda ákimshilik ǵımaratqa ot qoıǵanyn aıtqan. Shyǵyn kólemi 6 mln teńgege baǵalandy.
«Jedel-tergeý toby memlekettik organ ǵımaratynda órt bolǵanyn anyqtady. Osyǵan baılanysty Qylmystyq kodekstiń 202-babynyń 2-bóligi «bótenniń múlkin qasaqana joıý nemese búldirý» boıynsha sotqa deıingi tergeý sharalary qolǵa alyndy. Oqıǵa bolǵan jerdi tekserý barysynda spetsıfıkalyq ıisi bar lıtrlik shyny ydys pen plastıkalyq zat tabyldy», -dedi vedomstvodan.
Osy qylmysty jasaǵan nemese oǵan qatysy bar adamdardy anyqtaý úshin jedel-izdestirý is-sharalary qolǵa alyndy.
«Órtti Arshaly aýdany tótenshe jaǵdaılar bóliminiń qyzmetkerleri aýyzdyqtady. Adamdar aman», - deıdi polıtsııa departamentiniń baspasóz qyzmetinen.
Aıta ketsek, Aqmola oblysynda qoqys jınamaǵany úshin aýdan ákimniniń orynbasary jazaǵa tartylǵan bolatyn.
