Aqmola oblysynda memlekettik qyzmetshilerge qurmet kórsetildi
Bıyl atalǵan mereke Astana qalasynyń jáne Qazaqstan Respýblıkasy Memlekettik qyzmet isteri jónindegi agenttiktiń qurylǵanyna jıyrma jyl tolýymen tuspa-tus kelip otyr. «Kókshetaý» mádenıet saraıynda ótkizilgen saltanatty shara shymyldyǵy memlekettik qyzmetke jańadan kelgen jastardyń ant qabyldaý rásimimen ashylyp, oblys ákimi apparatynyń basshysy Qanat Shókenov quttyqtaý sóz sóıledi.
«Memlekettik qyzmetshi - memleketimizdiń aınasy. Halyqtyń senimin aqtaý, ultymyzdyń abyroıyn asyrý, elimizdiń basty tiregi bolý - barlyǵymyzdyń mártebeli mindetimiz. Táýelsiz elimizdiń órkendeý jolynda sizderdiń eńbekterińiz zor. Memlekettik qyzmet atqarý qoǵam men memleket tarapynan erekshe senim bildirý bolyp tabylady jáne memlekettik qyzmetshilerdiń moraldyq-ádeptilik beınesine joǵary talaptar qoıylady», dedi Qanat Shókenov.
Aıta keteıik, qazirgi tańda elimizdegi memlekettik qyzmetshilerdiń sany 90 myńnan asady. Sonyń ishinde Aqmola oblysyndaǵy 707 memlekettik organdarda 6 myń memlekettik qyzmetshi eńbek etýde. Olardyń ishinde ǵylym kandıdattary, «Bolashaq» baǵdarlamasynyń jáne memlekettik basqarý akademııasynyń túlekteri bar. Búgingi kúni oblystaǵy memlekettik qyzmetshilerdiń tórtten bir bóligi - 29 jasqa deıingi jastar.
Memlekettik qyzmetke qosqan úlesi úshin oblys ákimi apparatynyń personaldy basqarý qyzmetiniń basshysy Janar Temirhanovaǵa «Úzdik memlekettik qyzmetshi» tósbelgisi tabys etildi. Mereke ıeleriniń taǵy bir toby oblys ákiminiń, sondaı-aq, Memlekettik qyzmet isteri jáne sybaılas jemqorlyqqa qarsy is-qımyl Agenttiginiń Aqmola oblysy boıynsha departamenti basshysynyń Alǵys hattarymen marapattaldy.
