Aqmola oblysynda memlekettik qyzmetke daryndy jastardy tartýǵa basymdyq berilgen
KÓKShETAÝ. QazAqparat - Aqmola oblysynda memlekettik qyzmetshilerdi daıarlaýda sapaly bilimge basymdyq berilýde. Memlekettik qyzmette isteıtinderdiń arasynda ǵylym doktorlary jáne kandıdattary, «Bolashaq» baǵdarlamasy, QR Prezıdenti janyndaǵy memlekettik basqarý akademııasynyń túlekteri bar, dep habarlaıdy QazAqparat tilshisi Aqmola oblysy boıynsha memlekettik qyzmet isteri jáne sybaılas jemqorlyqqa qarsy is-qımyl departamentine silteme jasap.
Vedomstvonyń deregi boıynsha, Aqmola oblysynda 707 memlekettik organ, 5 909 laýazym tirkelgen. Qazirgi kezde, 8,3 paıyz bos oryn bar.
«Memlekettik qyzmetke reforma júrgizý memlekettik qyzmet quramynyń sapasyn arttyrýǵa múmkindik beredi. Memlekettik qyzmettegilerdiń 89,1 paıyzy joǵary bilimdi, onyń ishinde 13 paıyzynda eki nemese odan kóp joǵary bilimi bar. Oǵan qosa, Memlekettik qyzmettegilerdiń arasynda ǵylym doktorlary jáne kandıdattary, «Bolashaq» baǵdarlamasy, QR Prezıdenti janyndaǵy memlekettik basqarý akademııasynyń túlekteri bar», dep atap ótti óńirlik kommýnıkatsııalar qyzmetindegi brıfıngte Aqmola oblysy boıynsha memlekettik qyzmet isteri jáne sybaılas jemqorlyqqa qarsy is-qımyl departamentiniń memlekettik qyzmet basqarmasynyń basshysy Gúlmıra Evnıeva.
Sonymen qatar, ol memlekettik qyzmetshiler qataryna talantty jáne belsendi jastardy tartý boıynsha joǵary jáne arnaıy orta bilim berý oryndarynyń stýdentterimen kezdesýler, jastar arasynda bos oryndar jármeńkesi tárizdi sharalar turaqty túrde uıymdastyrylyp otyratynyn atap ótti.
Aıta keteıik, vedomstvonyń deregi boıynsha, memlekettik qyzmetshilerdi baıqaý arqyly qyzmetke tańdaý, olardyń odan ári qyzmettik mańsabynyń ósýine septigin tıgizedi. Ótken jyldyń sáıkes kezeńimen salystyrǵanda memlekettik qyzmetshilerdiń 56,1 paıyzy laýazymǵa taǵaıynaldy. Bıylǵy jyldyń basynan beri bul kórsetkish 75,2 paıyzdy qurady.
