Aqmola oblysynda memlekettik qyzmet kórsetýde 500 ret zań buzylǵan

KÓKShETAÝ. QazAqparat-Aqmola oblysynda memlekettik qyzmet kórsetýdiń elektrondy formatqa kóshý kórsetkishi 82,4 paıyzdy quraıdy. Bul týraly óńirlik kommýnıkatsııalar qyzmetinde ótken brıfıngte Aqmola oblysy boıynsha memlekettik qyzmet isteri jáne sybaılas jemqorlyqqa qarsy is-qımyl departamentiniń memlekettik qyzmet basqarmasynyń basshysy Ádilbek Muhamedjanov aıtty, dep habarlaıdy QazAqparat tilshisi.

Onyń sózinshe, elektrondy úkimetti nasıhattap, tıimdiligin túsindirý baǵytynda júrgizilgen jumystardyń arqasynda óńirde memlekettik qyzmettiń 82,4 paıyzy elektrondy formatta kórsetiledi.

«Departament eń aldymen qyzmet alýshylardyń aryz-shaǵymdaryna nazar aýdarady. Osy rette, memlekettik qyzmetshilerdiń jaýapkershiligin arttyryp qana qoımaı, azamattardyń quqyǵyn qalpyna keltirýge basymdyq beriledi», -dep atap ótti Ə.Muhamedjanov.

Aıtalyq, bıylǵy jyldyń 1 toqsanynda departamentke memlekettik qyzmet kórsetý sapasyna qatysty kelip túsken 10 shaǵym qaraldy. Osyǵan baılanysty josparsyz 10 tekseris júrgizildi jəne 4 azamattyń quqyǵy qalpyna keltirildi.

«Jalpy, memlekettik qyzmet kórsetýde zańnamanyń saqtalýyn qadaǵalaý boıynsha 16 baqylaý sharalary júrgizildi. Osynyń nətıjesinde 500 zańbuzýshylyq anyqtaldy. Onyń kóbi jergilikti basqarý organdarynda jol berilgen. Sonyń ishinde sebepsiz qyzmet kórsetýdi doǵarý, tıisti qujattarynsyz qyzmet kórsetý, qyzmet kórsetý merziminiń sozylyp ketýi sııaqty zańbuzýshylyqtar bar», - dep tolyqtyrdy Ə.Muhamedjanov.

Oǵan qosa, 8 laýazymdy tulǵaǵa qatysty əkimshilik quqyqbuzýshylyq boıynsha 20 hattama toltyryldy. Sondaı-aq, memlekettik qyzmet kórsetýde əkimshilik kedergilerdi anyqtaý boıynsha «Qupııa tutynýshy» qoǵamdyq baqylaý ədisi» jobasy sheńberinde 18 mekemede reıdtik sharalar qolǵa alyndy.