Aqmola oblysynda memleketke 1,7 mıllıard teńge zalal keltirgen qylmystyq top anyqtaldy

KÓKShETAÝ. QazAqparat - Aqmola oblysynyń prokýratýrasy taýarlardy is júzinde jetkizbeı, jumystardy oryndamaı, jalǵan shot-faktýralardy jazý faktilerin anyqtady, dep habarlaıdy QazAqparat tilshisi vedomstvonyń baspasóz qyzmetine silteme jasap.

Vedomstvonyń málimetinshe, Nur-Sultan qalasy jáne Aqmola oblysynyń turǵyndary asa iri mólsherde bıýdjetke salyq tóleýden jaltarý maqsatynda bıznestiń jekelegen sýbektilerine jalǵan shot–faktýralar jazyp bergen.

Osyǵan baılanysty óńir prokýratýrasy QR Qylmystyq kodeksiniń 216-babynyń 3-bóligi boıynsha qylmystyq isti tirkep, tergeý amaldaryn júrgizý úshin Aqmola oblysy boıynsha ekonomıkalyq tergeý departamentine tapsyrdy.

«Tergeý barysynda atalǵan tulǵalardyń qarsy áreketteri arqyly memleketke 1,7 mıllıard teńgeden astam somaǵa materıaldyq zalal keltirilgeni anyqtaldy. Qazirgi ýaqytta sotqa deıingi tergeý jalǵasýda. Tergeý múddelerine qatysty basqa málimetter jarııalanbaıdy», - dedi Aqmola oblysy prokýratýrasynyń baspasóz qyzmetindegiler.

Osy rette, prokýratýra qyzmetkerleri turǵyndarǵa qarjy salasyndaǵy quqyq buzýshylyqtardan zardap shekse nemese osyǵan uqsas jaǵdaılardy biletin bolsa, birden Aqmola oblysynyń prokýratýrasyna 8 [phone], Aqmola oblysy boıynsha ekonomıkalyq tergeý departamentine 8 [phone] senim telefondary boıynsha habarlasýyn suraıdy.