Aqmola oblysynda memleketaralyq izdeýde júrgen eki qylmysker ustaldy
KÓKShETAÝ. QazAqparat - Aqmola oblysynda «Kelimsek-2019» jedel sharasy barysynda memleketaralyq izdeýde júrgen eki qylmysker ustaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, oblys aýmaǵynda shildeniń 16-17 aralyǵynda «Kelimsek-2019» jedel aldyn alý sharasy júrgizildi. Oǵan oblystyq PD jeke quramynan 300 qyzmetker jumyldyryldy. Atalǵan shara oblys aýmaǵynda turyp jatqan, sondaı-aq, jumys istep júrgen shetel azamattary tarapynan kóshi-qon zańnamalaryn buzǵanyn anyqtaý maqsatynda qolǵa alynyp otyr. Eki kún boıy júrgizilgen jedel-aldyn alý sharasy kezinde kóshi-qon polıtsııasynyń qyzmetkerleri QR kóshi-qon zańnamasynyń buzylýyna qatysty 150 ákimshilik hattama toltyrdy.
«Naqtyraq aıtsaq, 2019 jylǵy 16 shildede tártip saqshylary Reseı Federatsııasynyń 25 jastaǵy turǵynyn ustady. Ol Reseıdiń QK-niń 158-baby 1-bóligi boıynsha qylmys jasaǵany úshin Tatarstan Respýblıkasynyń Jazany oryndaý federaldy qyzmet basqarmasy tarapynan izdeýde bolǵan.
Sonymen qatar, shara barysynda polıtsııa QR QK-niń 188-baby 2-bóligi boıynsha qylmys jasap, izdeýde júrgen 46 jastaǵy qylmysker jáne sot belgilegen merzimde elden shyǵý týraly Qazaqstan sotynyń sheshimin oryndamaǵan ózbekstandyqty ustady», deıdi vedomstvodan.
Budan bólek, oblysta QR Kóshi-qon zańnamasynyń buzǵany úshin QR ÁQbK-niń 518-baby boıynsha 28 sheteldikti qabyldaýshy tarap jáne sheteldik jumys kúshin qoldanǵan 8 jumys berýshi jaýapkershilikke tartyldy. Al, QR kóshi-qon zańnamasyn buzǵan 111 shetel azamaty QR ÁQbK 518-baby boıynsha jaýapkershilikke tartyldy. Sondaı-aq, sheteldikterdi el aýmaǵynan shyǵarý týraly 20 sot aktisi qabyldansa, 6 shetel azamatynyń ýaqytsha bolýy merzimi qysqartyldy.
