Aqmola oblysynda Memleket basshysynyń óńirge jumys sapary talqylandy
KÓKShETAÝ. QazAqparat - Aqmola oblysy ákimdiginde Memleket basshysy Qasym- Jomart Toqaevtyń óńirge jumys sapary talqylandy, dep habarlaıdy QazAqparat tilshisi.
Aımaq basshysy Ermek Marjyqpaevtyń tóraǵalyǵymen ótken apparat keńesinde aıtylǵandaı, sońǵy eki jylda óńirde sýarmaly egis kólemi birshama artqan. 2022 jyldary sýarmaly egis kólemin taǵy 17,7 myń gektarǵa ulǵaıtý josparlanǵan. Tereńdetip óńdeý jobalaryn júzege asyrý arqyly oblysta aýyl sharýashylyǵy ónerkásibinde eńbek ónimdiligin 2,5 jarym esege arttyrý múmkindigi bar.
«Prezıdenttiń tapsyrmasy boıynsha A.I.Baraev atyndaǵy astyq sharýashylyǵy ǵylymı – óndiristik ortalyǵynyń áleýetin paıdalaný qajet», – dep atap ótti aımaq basshysy.
Sonymen qatar, Ermek Marjyqpaev etti jáne sútti mal sharýashylyǵyn damytý baǵytyndaǵy baǵdarlamalar tárizdi qysqa merzim ishinde sýarmaly egistik óńirlik baǵdarlamasyn ázirleý týraly tapsyrma berdi. Aýyl sharýashylyǵy jerleriniń úlesin arttyrý, Býrabaı jáne Şýche kólderin tazalaý, Kókshetaý qalasynda Qopa kóli men Qylshaqty ózenin tazalaý boıynsha jumystar jan-jaqty talqylandy.
Memlekettik – jekeshelik seriktestik sheńberinde Kókshetaý qalasynda saǵatyna 180 MVt elektr qýatyn jáne 450 Gkal jylý qýatyn óndiretin jylý elektr ortalyǵyn salý josparlanǵan. Eger jyl sońyna deıin slovenııalyq ınvestor ózine júktelgen mindettemeni oryndamasa, onda baıqaý ótpedi dep eseptelinedi. Budan bólek, Jarqaıyń aýdanyndaǵy Masaly temir kenishi bazasyndaǵy taý ken –metallýrgııa kesheniniń qurylysy úshin ınvestor izdestirilýde.
Oblys ortalyǵynda sý tazalaý nysanyn salý úshin 3,9 mıllıard teńge, óńirdegi eldi-mekenderdi sapaly aýyzsýymen qatamasyz etý úshin 40 mıllıard teńge qarjynyń aldyn ala esebi shyǵaryldy.
Sonymen qatar, Şýche-Býrabaı kýrorty aımaǵy jáne Nur-Sultan qalasy aınalasyndaǵy eldi-mekenderdiń ınfraqurylymy jobalaryn júzege asyrý, Tselınograd jáne Arshaly aýdandaryn gazdandyrý boıynsha málimetter tyńdaldy. Arshaly aýdanynda jobalyq-smetalyq qujattardy ázirleý kestesiniń buzylýyna jol berilgeni aıtyldy. Jalpy, 20 eldi mekende 1 022 shaqyrym gaz taratý jelisi salyndy. Qurylys montajdaý jumystary jeltoqsan aıynda bastalyp, 2021 jyldyń sońynda aıaqtalady.
Budan ári apparat keńesinde «qarapaıym zattar ekonomıkasy» boıynsha jobalardy júzege asyrý, áleýmettik mańyzdaǵy azyq-túlik taýarlarynyń baǵasyn ustap turý, úsh aýysymda bilim beretin mektepter máselesi de sóz boldy.Jıyndy qorytyndylaǵan aımaq basshysy E.Marjyqpaev josparly kórsetkishterge oryndamaǵan birqatar basshylardyń tártiptik jaýapkershilikke tartylatynyn eskertti.
