Aqmola oblysynda mektepterdi qoǵamdyq baqylaý toby tekserýde
KÓKShETAÝ. QazAqparat - Qoǵamdyq baqylaý toby bilim berý nysandaryn sanıtarlyq talaptarǵa saı bolýyn tekserýde. Bul týraly Aqmola oblysy boıynsha qoǵamdyq baqylaý tobynyń úılestirýshisi Olesıa Baımova aıtty, dep habarlaıdy QazAqparat tilshisi.
«Bilim kúni qoǵamdyq baqylaý tobynyń volonterleri Şýchınsk qalasyndaǵy on eki mekteptiń segizine tekseris júrgizdi. Onyń ekeýi jóndeý jumystary júrgizilip jatqandyqtan qazan aıyna deıin jabyq», - deıdi Olesıa Baımova.
Onyń sózinshe, qazirgi kezde óńirdegi bilim berý oryndaryndaǵy sanıtarlyq jaǵdaı mektep basshylyǵy men jergilikti bıliktiń baqylaýynda.
«Tekserilgen mektepterdiń barlyǵy sanıtarlyq normalarǵa saı, mekteptiń kire beristerine sanıtaızer ornatylǵan, barlyq synyptar men personaldarda maska jáne saýsaqqap bar. Al, mekteptiń kire beristerinde medıtsınalyq qyzmetkerler dene qyzýyn tekserip otyrady. Synyptardyń barlyǵy oqý jylyna daıyndalǵan. Oryndyqtar men partada áleýmettik ara qashyqtyq qarastyrylllǵan. Keıbir mektepter kvarts shamdaryn qoldanady. Úzilis ýaqyty da dálizde oqýshylar jınalyp qalmaý úshin ár synypqa ár túrli berilip otyr. Qorǵanys zattarynyń qory eki aıǵa jetkilikti», - deıdi ol.
Ol atap ótkendeı, karantındik talaptardyń buzylýy shaǵyn kásipkerlik tarapynan jol beriledi. Ony der kezinde anyqtap, tıisti shara qoldanǵan mańyzdy.
«Azamattar tarapynan karantın talaptarynyń saqtalmaǵandyǵy jóninde shaǵyndardyń basym kópshiligi shaǵyn bızneske qatysty túsedi. Qoǵamdyq baqylaý osy máselege qatty kóńil bóledi. Onyń qorytyndylary BAQ pen álýemettik jelide jarııalanyp turady», - dep qorytyndylady.
Aıtalyq, karantın kezinde Jarqaıyń aýdanynda qudalyq ótkizgen meıramhana ıesi ákimshilik jazaǵa tartylǵan bolatyn.
Sondaı-aq, 18 tamyzda Arshaly aýdanynyń Jibek joly aýylyndaǵy demalys ornynda kópshiliktiń qatysýymen otbasylyq is-shara ótkizilgeni anyqtalyp, ony uıymdastyrǵan kásipkerge aıyppul salyndy.
Eske sala keteıik, aǵymdaǵy jylǵy tamyzdyń 11-de Densaýlyq saqtaý mınıstri Alekseı Tsoı elimizdegi medıtsınalyq mekemelerdiń ishindegi jaǵdaıdy baqylaý boıynsha halyq belsendilerinen quralǵan qoǵamdyq baqylaý qurylatynyn atap ótken bolatyn. Bul bastama QR Aqparat jáne qoǵamdyq damý mınıstrligi tarapynan qoldaý tapty.
