Aqmola oblysynda mektep túlekterine attestat kezekpen beriledi
KÓKShETAÝ. QazAqparat – Koronavırýs indetiniń taralýy saldarynan engizilgen karantındik rejım talaptaryna baılanysty elimizdiń ózge óńirleri sııaqty Aqmola oblysynda mektep bitirýshilerge attestat kezekpen beriledi, dep habarlaıdy QazAqparat tilshisi oblystyq bilim basqarmasyna silteme jasap.
Vedomstvonyń málimetinshe, oblystaǵy mektep bitirýshi túlekterdiń sońǵy qońyraý saltanatyn attestat tapsyrý rásimimen birge 3-4 maýsym aralyǵynda ótkizý josparlanǵan.
«Karantın talaptaryna baılanysty árbir 11-synyptyń merekelik sharasyna 40 mınýt ýaqyt belgilenip otyr. Máselen, bir mektepte úsh 11-synyp bolsa, olardyń árqaısysy óz synybymen jáne ata-analarynyń qatysýymen bul sharany bólek, mekteptiń aýlasynda nemese sport zalynda ótkizedi. Sonymen birge, saltanatty shara barysynda 1,5 metr araqashyqtyq saqtalýy tıis, ıaǵnı, mektep ákimshiligi áleýmettik araqashyqtyqtyń saqtalýyna mán berýi tıis» deıdi vedomstvodan.
Aıta keteıik, bıyl Aqmola oblysynda 4515 oqýshy mektep bitiretin bolsa, onyń 297-i - Altyn belgi ıegeri, 187-i - bilim ordasyn úzdik attestatpen aıaqtaǵaly otyr.
Osyǵan deıin habarlaǵanymyzdaı, mektep bitirýshi 4515 túlektiń 3718-i nemese mektep bitirýshilerdiń 82,3 paıyzy UBT tapsyrýǵa ótinish bergen bolatyn.
