Aqmola oblysynda mektep shatyrynan 9-synyp oqýshysy qulap ketti
KÓKShETAÝ. QazAqparat - Aqmola oblysynda mektep shatyryn jóndeý kezinde 9-synyp oqýshysy qulap ketti. Osyǵan baılanysty polıtsııa is qozǵady, dep habarlaıdy QazAqparat tilshisi.
Oblystyq polıtsııa departamenti baspasóz qyzmetiniń málimetinshe, qyrkúıektiń 10-ynda saǵat 12:25-te Aqkól aýdandyq ortalyq aýrýhanasynyń medbıkesinen «jabyq bas súıek-mı jaraqaty, bas mıynyń shaıqalýy, bas súıeginiń synýy» dıagnozymen 14 jastaǵy jasóspirimniń qabyldaý bólmesine jetkizilgeni týraly telefon habary tústi.
Anyqtalǵandaı, 10 qyrkúıekte saǵat 10:00 shamasynda kámeletke tolmaǵan bala Aqkóldegi J.Bekturov atyndaǵy №3 orta mektepke kelgen. Eńbek shartyn jasaspaı mektep ǵımaratyn jóndeýdi júzege asyratyn qosalqy merdiger uıymnyń brıgadıriniń tapsyrmasyn oryndaǵan.
Tehpersonaldyń aıtýynsha, keıinirek bala ǵımarattyń tóbesinde júrgeninde, aıaǵy taıyp, jerge qulaǵan. Jedel medıtsınalyq kómekti oqý ornynyń medbıkesi shaqyrdy. Búgingi tańda mektep qashyqtan jumys isteıdi. Zardap shekken kámeletke tolmaǵan bala tańerteń beınekonferentsııa arqyly mektep sabaqtaryna qatysqan. Al, balanyń mektep aýmaǵynda júrgendigin mektep dırektory da bilmegen.
Balanyń zardap shekkendigin oblystyq bilim basqarmasyndaǵylar da rastady.
«Iá, rasynda da, bul mektepte jóndeý jumystaryn júrgizý kezinde jumysshy zardap shekti, ol mektep oqýshysy bolyp shyqty. Qazirgi ýaqytta bala óz ózine keldi, jaryqty sezedi, kózin ashady. Aýdandyq aýrýhana dárigeriniń málimetinshe, sanavıatsııa dárigeri tekserip, bala oblystyq aýrýhanaǵa tasymaldaýǵa muqtaj emestigin aıtty. Osy oqıǵa boıynsha aýdandyq polıtsııa bólimi tarapynan tergeý júrgizilýde», - dedi bilim basqarmanyń baspasóz qyzmetindegiler.
Polıtsııa departamentinen atap ótkendeı, qazirgi kezde Qylmystyq kodekstiń 156 babynyń 2 bóligi «eńbekti qorǵaý erejelerin abaısyzda densaýlyqqa aýyr zııan keltirýge ákep soqqan buzýshylyq» boıynsha is qozǵalyp, tergeý amaldary júrgizilýde.
