Aqmola oblysynda medıtsınalyq mekemelerdiń jabdyqtalý kórsetkishi ósti
Aqmola oblysy Densaýlyq saqtaý basqarmasynyń málimetinshe, óńirde medıtsınalyq uıymdardy materıaldyq-tehnıkalyq jaraqtandyrýdy jaqsartýǵa erekshe nazar aýdarylyp keledi. 2022 jylǵy 8 aqpanda Memleket basshysy Qazaqstan Respýblıkasy Úkimetiniń keńeıtilgen otyrysynda quny 20 mıllıon teńgeden asatyn medıtsınalyq tehnıkany «SK-Farmatsııa» JShS bazasynda ortalyqtandyrý arqyly satyp alýǵa kóshýdi qamtamasyz etýdi tapsyrdy.
«Bıylǵy jyly 50 birlik medıtsınalyq tehnıkany satyp alýǵa 1,5 mıllıard teńge bólindi. Onyń ishinde respýblıkalyq bıýdjetten sýbventsııalar esebinen densaýlyq saqtaýǵa 32 birlik medıtsınalyq tehnıka satyp alý úshin 1,3 mıllıard teńge bólindi, 18 birlik medıtsınalyq tehnıka jergilikti bıýdjet qarajaty esebinen 191,9 mıllıon teńge somaǵa satyp alynady. Jaqyn arada satyp alynǵan jabdyqty jetkizý kútilýde», - dedi vedomstvodan.
2022 jyldyń 10 aıynda ótken jyldyń sáıkes kezeńimen salystyrǵanda medıtsınalyq jabdyqtarmen jaraqtandyrý 1,5 paıyzǵa artyp, 80,7 paıyzdy qurady.
«Sonymen birge, medıtsınalyq nysandardyń ǵımarattaryn sáıkestendirý boıynsha úlken jumystar júrgizilýde. Kúrdeli jóndeý jumystaryn júrgizý úshin jobalaý-smetalyq qujattamany ázirleý boıynsha jumystar júrgizilýde», - dep tolyqtyrdy vedomstvodan.
Respýblıka boıynsha óńirlerdiń ákimdikterimen birlesip 655 medıtsınalyq-sanıtarlyq alǵashqy kómek kórsetetin nysanyn salý boıynsha daıyndyq jumystary bastaldy.
Osy rette Aqmola oblysynyń aýyldarynda 38 MSAK nysanyn (14 dárigerlik ambýlatorııa, 21 feldsherlik-akýsherlik pýnkt, úsh medıtsınalyq pýnkt) salý josparlanǵan.
Onyń ishinde Tselınograd aýdanynda 16 nysan, Shortandy aýdanyndaǵy tórt nysan, Aqkól jáne Bulandy aýdandaryndaǵy úsh nysan, Esil jáne Zerendi aýdandarynda ekeýden, Atbasar, Jarqaıyń, Arshaly, Astrahan, Birjan sal, Ereımentaý, Jaqsy jáne Egindikól aýdandarynda bir bir nysannan bar.
Budan bólek, respýblıka boıynsha pılottyq joba sheńberinde 32 kópbeıindi aýdandyq ortalyq aýrýhanalardy ashý jáne qaıta jańartý qarastyrylǵan.
Sonyń ishinde Aqmola oblysynda eki aýrýhanany qaıta jaraqtandyrý josparlanǵan. Bul Atbasar jáne Bulandy aýdandaryndaǵy kópsalaly aýdanaralyq aýrýhanalar. Aýrýhanalarda ınsýlt jáne kardıologııalyq bólimsheler, Teri arqyly koronarlyq aralasý-ortalyqtar, jansaqtaý jáne qarqyndy terapııa bólimsheleri, az ınvazıvti hırýrgııa, travmatologııa jáne ońaltý bólimsheleri ashylady. Aýrýhanalardy zamanaýı medıtsınalyq jabdyqtarmen jaraqtandyrý (KT, MRT, angıograf, saraptamalyq klassty ÝDZ, endoskopııalyq, reanımatsııalyq jabdyqtar, medıtsınalyq ońaltý úshin) jáne kúrdeli jóndeý jumystaryn júrgizý kózdelgen.
Sonymen birge, Tselınograd aýdanynyń Qoıandy aýylynda alǵashqy medıtsınalyq-sanıtarlyq kómek kórsetý ortalyǵynyń jáne Qosshy qalasynda 100 adam qabyldaıtyn emhananyń qurylysy jalǵasyp jatyr.
Atbasar aýdanynyń Novoselskoe aýylynda 170,1 mıllıon teńgege feldsherlik-akýsherlik pýnkt jáne Atbasar aýdanynyń Sochınskoe aýylynda medıtsınalyq pýnkt salýǵa «Shańyraq-XII» jaýapkershiligi shekteýli seriktestigimen kelisimshart jasaldy.
Vedomstvodan atap ótkendeı, budan bólek, 2025 jylǵa deıin ult densaýlyǵy jobasyn júzege asyrý aıasynda Kókshetaý qalasynda kópbeıindi aýrýhana qurylysy júrip jatyr.
«Búgingi kúni Saryarqa yqshamaýdanynda jergilikti atqarýshy organ tarapynan 17 gektar jer telimi bólingen. Bul baǵyttaǵy jumystar odan ári jalǵasyp jatyr», - dep túıindedi vedomstvonyń baspasóz qyzmetinen.
