Aqmola oblysynda medıtsına qyzmetkerleriniń ústinen qylmystyq is qozǵaldy
KÓKShETAÝ. QazAqparat - Aqmolalyq polıtseıler Býrabaı aýdanynda 2 jasar qyzdyń ólimine qatysty qylmystyq is qozǵady, dep habarlaıdy QazAqparat tilshisi Aqmola oblystyq polıtsııa departamentiniń baspasóz qyzmetine silteme jasap.
«Býrabaı aýdanynda kámelettik jasqa tolmaǵan balanyń ólimi boıynsha QR QK 317-baby («Medıtsına nemese farmatsevtıka jumyskeriniń kásiptik mindetterin tıisinshe oryndamaýy») boıynsha sotqa deıingi tergeý jumystary júrip jatyr», - dedi vedomstvoda.
Qazirgi ýaqytta komıssııalyq saraptama taǵaıyndalǵan. Onyń nátıjesi boıynsha protsessýaldyq sheshim qabyldanady.
Eske salaıyq, 2018 jyly 17 qazanda 2 jastaǵy bala Býrabaı aýdandyq kóp salaly aýrýhananyń juqpaly aýrýlar bólimine ishek taıaqshasy ınfektsııasymen jatqyzylǵan edi. Eki kúnnen keıin qyzdy densaýlyǵynyń nasharlaýyna baılanysty jansaqtaý bólimine aýystyrǵan. 20 qazanda ol qaıtys bolǵan. Ol Şýche qalasyndaǵy saýda úıleriniń birinen satyp alynǵan shujyqty jep, naýqastanyp qalǵan.
Saraptama úshin osy saýda úıinde satylatyn 16 túrli shujyq alyndy. Jospardan tys kóptegen tekserister júrgizildi.
Alaıda, tekserýdiń nátıjesi boıynsha onyń shujyqtan ýlanǵany rastalmady. Qyzdyń denesin ashý nátıjesinde balanyń asqazan men ishekke zaqym keltiretin rotavırýstyq ınfektsııa saldarynan kóz jumǵany belgili boldy.
