Aqmola oblysynda medıtsına qyzmetkerleri bir rettik járdemaqydan qaǵylyp otyr

KÓKShETAÝ. QazAqparat - Aqmola oblysynda «Avıtsenna-Býrabaı» JShS qyzmetkerleri bir rettik tólenetin saýyqtyrý járdemaqysynan qaǵylyp otyr. Bul týraly medıtsına qyzmetkerleri oblys basshylyǵy men quzyrly organdardan kómek surap hat jazdy, dep habarlaıdy QazAqparat tilshisi.

Dárigerlerdiń aıtýynsha, Býrabaıdaǵy kópbeıindi aýdanaralyq aýrýhana osydan birneshe jyl buryn «Avıtsenna-Býrabaı» JShS menshigine ótip ketken. Sonyń saldarynan JShS basshylyǵy bıyldan bastap 600-den astam qyzmetkerge bir rettik tólenetin saýyqtyrý járdemaqysyn berýdi doǵarǵan.

«Osy kúnge deıin saýyqtyrý járdemaqysyn alyp keldik. Endi jańa jyldan bastap ony tólemeıtin boldy. Qaıta qurý kezinde qandaı sharttar boldy, medıtsına qyzmetkerleri úshin áleýmettik kepildikter qarastyryldy ma, biz odan beıhabarmyz. «Avıtsenna-Býrabaı» JShS ákimshiligi bul týraly bizge habarlaǵan joq. Sol sebepti, biz mundaı sheshimge múldem qarsymyz», - deıdi terapevtik ýchaskelik qyzmettiń medbıkesi Jazıra Jákenova.

Oblystyq densaýlyq saqtaý basqarmasynyń málimetinshe, 2017 jylǵy 12 maýsymda Densaýlyq saqtaý basqarmasy men «Avıtsenna-Býrabaı» JShS arasynda memlekettik-jekeshelik áriptestik sharty jasalǵan. 2023 jylǵa deıin jumysshylarǵa saýyqtyrý járdemaqysy tólenip keldi. Alaıda, bıyl jeke uıym járdemaqy tóleýdi toqtatý týraly óz betinshe sheshim qabyldaǵan. Biraq Densaýlyq saqtaý basqarmasy men Aqmola oblysynyń ákimdigin bul týraly habardar etpegen. Sondaı-aq qyzmetkerlerge zańda belgilengen merzimde eńbekaqy tóleý sharttarynyń ózgergeni týraly aqparat bermegen.

«Bul rette medıtsına qyzmetkerleriniń eńbek sharttarynda demalys berý kezinde tólemderdi retteý týraly ereje kózdelmegen. 2023-2025 jyldarǵa arnalǵan salalyq kelisimde Densaýlyq saqtaý júıesiniń qyzmetkerlerine jyl saıynǵy aqyly eńbek demalysyn bergende jylyna bir ret qyzmetkerdiń bir laýazymdyq jalaqysynan kem emes mólsherde saýyqtyrý járdemaqysy tólenedi», - dedi vedomstvodan.

Bul daýly oqıǵaǵa qatysty Aqmola oblysy ákimdigi túsinikteme berdi.

«Densaýlyq saqtaý basqarmasy tarapynan «Avıtsenna-Býrabaı» JShS basshysy Evgenıı Bekaevqa kelisimshartty Qazaqstan Respýblıkasynyń zańnamasyna sáıkestendirý jáne medıtsına qyzmetkerleriniń eńbek qatynastaryn retteý qajettigi túsindirildi. Osy rette, medıtsına qyzmetkerleri óz quqyqtaryn qorǵaý úshin quqyq qorǵaý jáne ýákiletti organdarǵa júginýge quqy bar», - dep túsindirdi ákimdiktiń baspasóz qyzmetinen.