Aqmola oblysynda medbıke zańsyz morfın ampýlasyn úlestirgeni anyqtaldy
KÓKShETAÝ. QazAqparat - Aqmola oblysynda medbıke zańsyz morfın salynǵan ampýlany qoldanýǵa ruqsaty joq feldsherlerge úlestirgeni anyqtaldy, dep habarlaıdy QazAqparat tilshisi ІІD baspasóz qyzmetine silteme jasap.
Polıtseılerdiń deregi boıynsha aǵymdaǵy jyldyń 26-shy naýryzy kúni Aqmola oblysy aýmaǵynda júrgizilgen «Dopıng» jedel aldyn alý sharasy kezinde birqatar aýrhanalar men dárihanalarda esirtkilik jáne júıkege áser etetin zattardyń qoldaný erejesiniń buzylǵany anyqtaldy.
«Onyń ishinde aýdandyq aýrhananyń medbıkesi zańsyz morfın salynǵan ampýlany qoldanýǵa ruqsaty joq feldsherlerge úlestirgeni anyqtaldy. Qazirgi kezde, osy oqıǵaǵa baılanysty QR QK 303 babynyń 1 bólimi boıynsha sotaldy tergeý amaldary júrgizilýde. Atalǵan bap boıynsha aýrýhana qyzmetkerine 300 aılyq eseptik kórsetkish kóleminde aıyppul salynýy múmkin», dep túsindirdi ІІD baspasóz qyzmetindegiler.
Sondaı-aq, Kókshetaý qalasyndaǵy dárihanalardyń birinde «Mızoprostol» emdik preparatynyń retseptsiz jiberilgeni áshkerlendi.
Oǵan qosa, «Dopıng» jedel aldyn alý sharasy barysynda Atbasar, Sandyqtaý, Astarhan aýdandary jáne Kókshetaý qalasynda bir táýliktiń ishinde QR QK 296 babanyń 1-3 bólimi boıynsha (esirtki jáne júıkege áser etetin zattardy, olarǵa uqsas ózge de zattardy zańsyz qoldaný) qylmystyq iske jol berilgeni anyqtaldy.
