Aqmola oblysynda mas júrgizýshi polıtsııa kóligin zaqymdady
Aqmola oblysy polıtsııa departamentiniń bastyǵy Armanbek Baımýrzın Facebook-tegi paraqshasyna polıtseılerge qarsylyq kórsetip, olardyń qyzmettik kóligine zaqym keltirgen júrgizýshi kýáligi bolmaǵan er adamdy ustaý barysyndaǵy vıdeony jarııalady.
5 tamyz kúni saǵat 20:00 shamasynda «Jaqsy-Esil-Buzylyq» avtojolynyń 3-shi shaqyrymynda «Mitsubishi Outlander» markaly avtokóliginiń júrgizýshisi polıtsııa qyzmetkerleriniń talaptaryna baǵynbaı, qatty júrip, qashyp ketpek bolǵan.
«Qýyp bara jatqanda tártip buzýshy qyzmettik kólikke zaqym keltirdi. Májbúrli túrde toqtatylǵannan keıin júrgizýshi polıtseılerge qarsylyq kórsetken. Medıtsınalyq kýálandyrý qorytyndysyna sáıkes, tártip buzýshy jeńil dárejede mas bolǵan. Derekqordy tekserý barysynda 2017 jyldyń 9 qarashasy kúni júrgizýshi bes jylǵa deıin kólik júrgizý quqyǵynan aıyrylǵan bolyp shyqty. Qylmystyq kodekstiń 346-baby 1 bólimi «Kólik quraldaryn júrgizý quqyǵynan aıyrylǵan mas kúıdegi adamnyń kólik quralyn basqarýy» boıynsha sotqa deıingi tergeý bastaldy», - delingen jazbada.
Armanbek Baımýrzınniń aıtýynsha, bıyl óńirde júrgizýshi kýáliginen aıyrylǵan 243 júrgizýshi kólik aıdaǵany úshin ákimshilik jaýapqa tartylǵan. Buryn basqarý quqyǵynan aıyrylǵan 74 júrgizýshi mas kúıinde kólik aıdaǵany úshin qylmystyq jaýapqa tartylǵan. Mundaı faktilerdi anyqtaý boıynsha jumys kúndelikti júrgizilip jatyr.
«Aǵa leıtenant Q. Qabıev pen leıtenant Q. Toltanov yntalandyrylady. Óz ómirlerin táýekelge baılap otyryp, olar basqa bireýlerdiń ómirlerin aman alyp qalǵan bolýy múmkin. Polıtseılerdiń qyraǵylyǵy bolmaǵanda, bul oqıǵanyń nemen aıaqtalary belgisiz», - dep qorytty vedomstvo jetekshisi.