Aqmola oblysynda mamonttyń súıegi tabyldy
KÓKShETAÝ. QazAqparat – Aqmola oblysynyń Bulandy aýdanynda mamonttyń súıegi tabyldy, dep habarlaıdy QazAqparat tilshisi oblystyq tarıhı-mádenı murany qorǵaý jáne paıdalaný ortalyǵyna silteme jasap.
Ortalyq mamandarynyń málimetinshe, mamonttyń súıegi Novobratsk aýyldyq okrýgine qarasty Býdennovka aýylynyń mańynan aǵyp ótetin Arshaly ózeniniń jaǵasynan tabylǵan. Ony osy aýyldyń jergilikti turǵyny Valerıı Dýbovık kezdeısoq taýyp alyp, keıin tıisti organdarǵa habarlaǵan. Mamonttyń súıegi tabylǵan jerge oblystyq tarıhı-mádenı murany qorǵaý jáne paıdalaný ortalyǵynyń dırektory Serik Ysqaqov pen mamandary bardy.
«Elimizdegi epıdemıologııalyq jaǵdaıǵa, COVID-19 koronavırýstyq ınfektsııasynyń taralýyna jáne karantındik rejımniń engizilýine, túrli is-sharalardy ótkizýge tyıym salynýyna baılanysty, Ortalyq tabylǵan mamont súıegin odan ári tereń zertteýge Qazaqstan Ulttyq mýzeıiniń ǵalymdaryn shaqyra otyryp, osy jerde arheologııalyq qazba jumystaryn júrgizý úshin 2021 jylǵy josparǵa engizý mindetin alǵa qoıyp otyr», - deıdi Serik Ysqaqov.
Oblystyq tarıhı-mádenı murany qorǵaý jáne paıdalaný ortalyq mamandary atap ótkendeı, kezdeısoq olja ǵalymdar men zertteýshilerge, ǵylymı-zertteý protsesinde qyzyqty bolyp, janýarlardyń tirshilik etý ortasyn keshendi zertteýge múmkindik beredi dep otyr.
Eske sala ótsek, osyǵan deıin alyp janýarlar súıekteri Zerendi, Shortandy, Jaqsy, Tselınograd aýdandarynda tabylǵan bolatyn. Bul joly tabylǵan súıek osydan 10 myń jyl buryn ómir súrgen mamonttyń súıegi bolýy múmkin. Onyń uzyndyǵy 1,5 metrdi quraıdy. Qalyńdyǵy 30 sm jaqsy saqtalǵan.
Qazirgi tańda, atalmysh mamonttyń súıegi dáıekti ári egjeı-tegjeıli zertteý úshin Aqmola oblystyq tarıhı-ólketaný mýzeıine tapsyryldy.
