Aqmola oblysynda mal sharýashylyǵy qarqyndy damyp keledi
2020 jyly 4600 basqa arnalǵan 9 taýarly sút fermasynyń qurylysy bastalady, dep habarlaıdy QazAqparat tilshisi oblystyq ishki saıasat basqarmasyna silteme jasap.
Aqmola oblysy elimizdegi agroónerkásip salasy qarqyndy damyǵan óńirlerdiń biri. Óńirde eginshilikpen birgen mal sharýashylyǵyna da erekshe kóńil bólinýde.
Memlekettik qoldaýdyń arqasynda oblysta jyl ótken saıyn mal basy kóbeıip keledi. Bul sala etti jáne sútti baǵytta damýda. Ótken jyly 150 et óndirý fermasy ashylyp, asyl tuqymdy 10 myń bas iri qara satyp alyndy. Sondaı-aq, tórt taýarly - sút fermasy ashyldy.
Degenmen, oblystyń bar jetistigi bul ǵana emes, endi jergilikti mamandar ishki naryqtaǵy suranysty qanaǵattandyryp, óńirdiń eksporttyq áleýettin arttyrmaqshy. Bul úshin 2022 jyly et óndirisin 120 myń tonnaǵa, sút óndirisin 200 myń tonnaǵa jetkizý mindeti qoıylyp otyr.
Sonymen qatar, aýdandarda 7 myń iri qaraǵa arnalǵan mal bordaqylaý alańy men 135 et óndirý fermasyn ashý josparlanǵan. Onyń biri – Arshaly aýdanynda 7 myń malǵa arnalǵan («Aizet farms» JShS), Kóshetaý qalasynda 5 myń malǵa arnalǵan («Bıbord» JShS») jáne Tselınograd aýdanynda («Agropark» JShS).
Óńirde sút baǵytyndaǵy mal sharýashylyǵyn damytýǵa da kóńil bólinip keledi. Bıylǵy jyly 4600 sıyrǵa arnalǵan 9 taýarly-sút fermasynyń qurylysy bastalady. Onyń ishinde úsh iri ferma Aqkól, Astrahan jáne Atbasar aýdandarynda josparlanyp otyr.
Jalpy, agroónerkásip salasyndaǵy jańa jobalar otandyq óndiristi damytyp, «Qazaqstanda jasalǵan» taýar belgisimen shyǵarylatyn ónim kólemin arttyrýǵa múmkindik beredi.
