Aqmola oblysynda mal basy kóbeıdi
NUR-SULTAN. QazAqparat – Aqmola oblysynyń ákimi Ermek Marjyqpaev óńirdegi mal basy artqanyn málim etti, dep habarlaıdy QazAqparat tilshisi.
«Іri qara mal basynyń sany 3,2 paıyzǵa (545 myńǵa deıin) óskeni tirkeldi. Sonymen qatar usaq mal basy 3,5 paıyzǵa (740 myńǵa deıin), jylqy – 7,5 paıyzǵa (248,4 myń bas), qus sany 25 paıyz (9,5 mln) artty», - dedi Ermek Marjyqpaev Ortalyq kommýnıkatsııalar qyzmetinde.
Onyń aıtýynsha, etti jáne sútti mal sharýashylyǵyna erekshe ekpin qoıylyp otyr. Bıyl 6 myń bas asyl tuqymdy iri qara maldy satyp alý arqyly etti fermalardy qurý boıynsha 112 jobany júzege asyrý bastaldy. Sonymen qatar 4 myń bas maldy qamtıtyn 19 sútti-taýarlyq ferma iske asyrylyp jatyr.
Osy oraıda ol oblystyń aýyl sharýashylyǵy taýarlaryn óndirýshileri turaqty túrde elordaǵa azyq-túlik ónimderin jetkizip jatqanyn aıtty.
Budan buryn habarlanǵandaı, oblys ákimi 2021 jylǵy 5 aıdyń qorytyndysy boıynsha ekonomıkanyń kóptegen baǵyttarynda josparly ındıkatorlar oryndalǵanyn aıtty.
