Aqmola oblysynda laýazymdy tulǵaǵa para bergen ákim sottaldy

KÓKShETAÝ. QazAqparat – Shortandy kentiniń burynǵy ákimi laýazymdy tulǵaǵa para bergeni úshin sottaldy, dep habarlaıdy QazAqparat tilshisi Aqmola oblysy boıynsha sybaılas jemqorlyqqa qarsy is-qımyl departamentiniń baspasóz qyzmetine silteme jasap.

Vedomstvonyń málimetinshe, bıylǵy jyldyń 15 mamyrynda Kókshetaý qalalyq sotynyń úkimimen Aqmola oblysy Shortandy kentiniń eks-ákimi Ts. Mámbet 4 jylǵa bas bostandyǵynan aıyrylǵan. Ol jazasyn orta qaýipsizdik túzeý mekemesinde óteıdi.

«Ol quqyq qorǵaý organynyń qyzmetkerine ózine qatysty tergelip jatqan qylmystyq isti toqtatý úshin 7,9 mıllıon teńge somasynda para bergeni úshin kináli dep tanyldy. Sottalǵan memlekettik qyzmette jáne kvazımemlekettik sektorda qyzmet atqarý quqyǵynan ómir boıyna aıyryldy», - dedi vedomstvodan.

Úkim zańdy kúshine engen joq.

Aıta ketsek, budan buryn aqmolalyq kásipkerge dızeldi jeńildikpen berýden negizsiz bas tartylǵanyn jazǵan edik.