Aqmola oblysynda qylmysker áıeldi eki sábıimen birge órtep jibergen
KÓKShETAÝ. QazAqparat - Aqmola oblysynyń Jaqsy aýdanynda 3 adamnyń ómirin qıǵan qylmysker ómir boıyna bas bostandyǵynan aıyryldy, dep habarlaıdy «QazAqparat» HAA tilshisi oblystyq qylmystyq ister jónindegi aýdanaralyq mamandandyrylǵan sotyna silteme jasap.
Atalǵan sottyń keńse meńgerýshisi Magdalına Bılıalovanyń málimeti boıynsha, oblystyq qylmystyq ister jónindegi aýdanaralyq mamandandyrylǵan soty S.Petrenkoǵa qatysty qylmystyq isti qarady.
«Bul oqıǵa ótken jyldyń kúzinde bolǵan edi. Jaqsy aýdanyna qarasty aýyldardyń birinde turatyn S.Petrenko esh jerde jumys istemeıtin. Araq iship, jurttyń mazasyn alatyn onyń ústinen ýchaskelik ınspektorǵa birneshe shaǵym túsken. Degenmen de, jáı basbuzarlyǵy úshin ony jaýapqa tartý múmkin emes edi. Araq iship, kóringenmen shatysýǵa beıim turatyn onyń bul áreketiniń aqyry jaqsylyqqa uryndyrmaıtynyn ýchaskelik ınspektor eskertip aıtqan da. Biraq, sanasyn araq ýlaǵan azamat quqyq qyzmetkeriniń eskertýinen qorytyndy shyǵarmady», dedi Magdalına Bılıalova.
Oqıǵa bylaı órbigen: Araq ishken adamǵa dos ta, tanys ta kóp. Kúzdiń salqyn bir keshinde S.Petrenko kúıeýi joq jesir kelinshek A.Ivanovanyń úıinde araq iship otyrady. Emizýli balasy bar kelinshek eki keshtiń arasynda shaqyrýsyz kelgen qonaqqa ket ári demeı, ol ákelgen araǵyn qosyla ishedi. Araq basqa shaýyp, kóp uzamaı kelinshek mas bolyp, ústel basynda uıqyǵa ketedi. Osyny paıdalanǵan erkek ony jatyn bólmege aparyp, jynystyq qatynasqa túsedi. Birazdan keıin uıqysynan oıanǵan kelinshek jaǵdaıdy túsinip, «men erteń zorlaǵandyǵyń týraly ýchaskelik ınspektorǵa shaǵymdanamyn» deıdi. Buny estigende Petrenko qylmysynyń izin jasyrý úshin kelinshekti óltirý qajet degen oıǵa keledi. Sodan ol asúıge baryp, nan týraıtyn pyshaqty alady. Jatyn bólmede dıvanda otyrǵan kelinshektiń janyna kelip, júrek tusynan birneshe ret pyshaq salady. Áıel alǵan jaraqattarynan sol arada kóz jumǵan.
Budan keıin, qylmystyń izin jasyrýdy oılaǵan ol úıdiń esigin syrtynan jaýyp, esikke órt qoıady. Úıde 2015 jáne 2016 jyly týǵan sábılerdiń jatqanyn bile tura osyndaı áreketke barǵan Petrenko ottyń janyp, úıdiń órtene bastaǵanyna kóz jetkizgen soń ǵana oqıǵa ornynan qarasyn batyrady.
«Bul órt Ivanovanyń úıin túgel jalmap, kórshilerdiń qosalqy jaılaryn da sharpydy. Keıin sarapshylardyń málimetinen belgili bolǵandaı, órt 5 mıllıon teńge kóleminde shyǵyn keltirgen. Qansha qylmys izin jasyrdym dese de, Petrenko jazadan qashyp qutyla almady. Onyń keshkilik úı ıesi - kelinshekpen birge araq iship otyrǵanyn kórgen adamdar bolyp shyqty.
Sot úsh birdeı adamnyń ólimine sebep bolǵan S.Petrenkony aıypty dep taýyp, ómir boıyna bas bostandyǵynan aıyrý jazasyna kesti.
Sot sheshimi zańdy kúshine endi», - dedi M.Bılıalova
