Aqmola oblysynda qylmys kórsetkishi tómendedi

KÓKShETAÝ. QazAqparat – Byltyrǵy jyldyń qorytyndysy Aqmola oblysynda qylmystyq quqyq buzýshylyqtar sany 12 paıyzǵa azaıdy. Bul týraly QR Bas prokýratýrasy Quqyqtyq statıstıka jáne arnaıy esepke alý jónindegi komıtetiniń Aqmola oblysy boıynsha basqarmasy bastyǵynyń orynbasary Nazar Qapesov aıtty, dep habarlaıdy QazAqparat tilshisi oblystyq ishki saıasat basqarmasyna silteme jasap.

Onyń aıtýynsha, oblys krımınogendik jaǵdaı boıynsha respýblıkada 9-orynda tur. Oblystaǵy qylmystardyń 60 paıyzy aýdandardyń úlesinde, qalǵan 40-y Kókshetaý jáne Stepnogor qalalaryna tıesili.

«Tirkelgen quqyq buzýshylyqtar boıynsha Tselınograd aýdany kósh bastap tur. Bul astanaǵa jaqyn ornalasýyna baılanysty. Biraq bıylǵy jylmen salystyrǵanda bul aýdanda qylmystyń 17,2 paıyzǵa tómendegeni baıqalady. Al eń az kórsetkish Egindikól aýdanynda tirkelgen. Bul aýdanda ótken jyly 36 qylmys qana tirkeldi», - dedi Nazar Qapesov.

Vedomstvonyń aqparaty boıynsha quqyq buzýshylyqtardyń barlyq sanattary boıynsha oń dınamıka baıqalady. Mysaly, asa aýyr qylmystar sany – 15,4 paıyzǵa, aýyr qylmystar sany – 22,3 paıyzǵa, aýyrlyǵy ortasha qylmystar sany – 12 paıyzǵa jáne onsha aýyr emes qylmystar sany-13,5 paıyzǵa tómendedi.

Quqyq buzýshylyqtardyń jalpy sanynyń tómendeýine qaramastan, ótken jyly alaıaqtyqtyń 5,1 paıyzǵa ósýi baıqaldy. Alaıaqtyqtyń kóp bóligi ınternette jasaldy. Internet alaıaqtardyń negizgi maqsaty elektrondyq balamadaǵy aqsha qarajaty bolyp tabylady.

«Internet arqyly alaıaqtyq qylmystyń ósýine halyqtyń odan habardar bolýy sebep bolyp otyr. Búgingi tańda túsindirý jumystary júrgizilip jatyr jáne biz ýákiletti organdarǵa tıisti aqparat jiberýdemiz», - dep túıindedi Nazar Qapesov.

Aıta ketsek, 2021 jyly qylmystyq qol suǵýshylyqtyń nátıjesinde 4 712 azamat zardap shekti, onyń ishinde 2 306 áıel jáne 2 409 er adam.