Aqmola oblysynda qylmys kórsetkishi 33,7 paıyzǵa tómendegen
KÓKShETAÝ. QazAqparat - Aqmola oblysynda qylmys kórsetkishi 33,7 paıyzǵa azaıǵan. Bul týraly aımaq basshysy Ermek Marjyqpaevtyń tóraǵalyǵymen ótken qylmyspen kúres jáne zańdylyq, quqyqtyq tártipti qamtamasyz etý jónindegi óńirlik vedomstvoarlyq komıssııanyń otyrysynda aıtyldy, dep habarlaıdy QazAqparat tilshisi.
Jıynda aımaq basshysy Ermek Marjyqpaev qylmysty aldyn alýda qatań shara qoldaný qajettigi jáne barlyq memlekettik organdardyń kúshin úılestirý mindeti mańyzdy ekenin atap ótti.
Osy rette orta jáne aýyr qylmystarmen kúres boıynsha qolǵa alynǵan sharalar, ınternet alaıaqtyq jáne jol-kólik oqıǵalarynyń aldyn alý máselesi qaraldy.
«Bıyl koronavırýs pandemııasy qoǵam ómirine ózgerister engizdi. Jalpy, oblysta qylmys kórsetkishi 33,7 paıyzǵa azaıǵan. Óńirde qylmys deńgeıi 10 myń turǵynǵa 110 qylmystan keledi. Bul - respýblıka boıynsha eń tómen kórsetkish. Al, tergelip, ashylǵan qylmystyq isterdiń sany 37,3 paıyzǵa artqan», – deıdi PD baspasóz qyzmetindegiler.
Tirkelgen qylmystardy taldaý kórsetkendeı, turmystyq jaǵdaıdyń nasharlyǵy, spırttik ishimdik ishýdiń sońy qashanda janjalǵa, tipti aýyr qylmysqa ákep soǵyp jatady.
Osylaısha zańbuzýshylyqqa kóbine turmysy tómen, jumysy joqtar barady. Asa aýyr qylmystardyń basym kópshiligi masań kúıde jasalǵan.
Sonymen birge, jıynda karantın kezinde kıber-alaıaqtardyń kóbeıip ketkendigi de aıtyldy. Mundaı qylmystardyń ár bireýinde alaıaqtar aqparattyq jáne kommýnıkatsııalyq tehnologııa quraldaryn, uıaly telefon jáne ınternet jelisin qoldanady.
«Jedel izdestirý sharalary kezinde 110-nan astam qylmysqa qatysy bar 12 alaıaq ustaldy. Qalǵan ister boıynsha tergeý sharalary jalǵasýda» dep tolyqtyrdy vedomstvodan.
Komıssııa otyrysynda óńirde urlyqtyń tyıylmaı turǵany aıtylyp, jol apatynyń saldarynan bolatyn qaıǵyly oqıǵalardyń sebepteri men olardyń aldyn alý máselesi de kóterildi.
