Aqmola oblysynda kvazımemlekettik sektordaǵy jemqorlyq máselesi talqylandy
Bul týraly Aqmola oblysy boıynsha Sybaılas jemqorlyqqa qarsy is-qımyl departamenti qyzmetkerleriniń Kókshetaý qalasynyń ákimdigi janyndaǵy «Kókshetaý Jylý» ShJQ MKK-niń eńbek ujymymen ótken kezdesýinde aıtyldy, dep habarlaıdy QazAqparat tilshisi vedomstvonyń baspasóz qyzmetine silteme jasap.
Kezdesýde atalmysh departamenttiń aldyn alý jáne parasattylyq basqarmasynyń basshysy Baqytjan Ámirhanov sybaılas jemqorlyq jasaǵany úshin qylmystyq jáne ákimshilik jaýapkershilik, sondaı-aq sybaılas jemqorlyqqa qarsy is-qımyl salasynda departament júrgizip jatqan qajetti sharalar týraly kezdesýge qatysýshylarǵa aqparat berdi.
Aıta ketý kerek, ótken jyly jylý tarıfterin negizsiz kóterip, qyzmettik ókilettigin asyra paıdalanǵan «Kókshetaý Jylý» burynǵy bas dırektory Sergeı Jýkov pen onyń orynbasary Gaýhar Altynsarına sottaldy.
«Turǵyn úı-kommýnaldyq sharýashylyq, sonyń ishinde, jylýmen qamtamasyz etý salasy teris pıǵyldy qyzmetkerlerdiń túrli jemqorlyq shemalaryn júzege asyrý úshin qolaıly orta ekeni barlyǵyna anyq. Olar memlekettik qyzmetker bolmasa da kómir, mazýt satyp alý úshin memlekettik satyp alýdy júrgizý kezinde ózderiniń laýazymdyq ókilettikterin asyra paıdalanady. Osy oraıda, biz atalǵan jaǵdaılardy anyqtaý jáne jolyn kesý boıynsha jumysty jalǵastyrýdy kózdep otyrmyz. Alaıda, biz úshin sybaılas jemqorlyqpen kúreste aldyn alý sharalaryn júrgizý basty baǵyt ekendigin atap ótý qajet. Sondyqtan da, sybaılas jemqorlyq kórinisteriniń kez kelgen túrine tózbeýshilik tanytyp, óz jumystaryńyzdy parasatty jáne adal atqarýǵa shaqyramyz», - dedi Baqytjan Ámirhanov.