Aqmola oblysynda kúzgi dala jumystary aıaqtalýǵa jaqyn
KÓKShETAÝ. QazAqparat - Aqmola oblysynda kúzgi dala jumystary aıaqtalýǵa jaqyn. Bul týraly aımaq basshysy Málik Myrzalınniń tóraǵalyǵymen ótken apparat májilisinde aıtyldy, dep habarlaıdy QazAqparat tilshisi.
Májiliste oblystyq aýyl sharýashylyǵy basqarmasynyń basshysy Murat Balpan egin oraǵynyń jaı-japsary týraly aıtty. Onyń aıtýynsha, búgingi tańda kúzgi dala jumystary aıaqtalýǵa jaqyn. Qazir búkil dándi daqyldardyń 77,2 paıyzy jınap alynǵan.
«Ár gektardan orta eseppen 10,5 tsentnerden ónim jınalýda. Astyq sapasy jaqsy. Bıdaıdyń ulpasy 25-28 paıyzǵa jetýde. Jekeleı alǵanda 69 myń gektar maıly daqyldar, 12,5 myń gektar kartop, 3 myń gektar kókónis alqaptarynyń ónimi jınalǵan.
Ótken jyldyń osy kezeńimen salystyrǵanda oblys boıynsha 1 mıllıon 100 myń gektar alqaptyń dándi daqyldary artyq jınalyp otyr. Táýligine 200 myń gektar astyq bastyrý jónindegi josparly kórsetkish oıdaǵydaı oryndalýda. Egin oraǵyna 9 myń astyq kombaıny qatystyrylýda. Úkimetten 70 myń tonna kepildi janar-jaǵar maı bólingen. Astyq qabyldaý kásiporyndary 800 myń tonna astyq qabyldasa, 533 myń tonna tuqym quıyp alynǵan», dedi basqarma basshysy.
Oblys ákiminiń tapsyrmasy boıynsha, Aqmola oblysynda agroónerkásip keshenin damytý týraly arnaıy baǵdarlama ázirlenýde. Ol jýyrda talqylanyp, oblystyq ákimdikke usynylady. Memleketten josparlanǵan sýbsıdııalar ýaqytynda kelip túsýde.
Habarlama tyńdalǵannan keıin oblys ákimi aýa raıynyń qolaısyzdyqtaryn eskere otyryp, jaýapty naýqandy shıraq júrgizý, sóıtip, egin oraǵyn ýaqytynda sapaly aıaqtaýdy basty mindet etip júktedi.
