Aqmola oblysynda qurylys qarqyny artty
«Búginde Aqmola oblysy mańyzdy agrarlyq-ındýstrııalyq óńirlerdiń biri bolyp sanalady. Respýblıka kóleminde biz elimizde óńdeletin ýrannyń árbir 10 tonnasyn, 100% moıyntirekterdi, 67% astyq jınaý kombaındaryn, 47% mamandandyrylǵan avtomobılderdi, 45% altyndy kenderdi, 27% jartylaı óńdelgen altyndy, 43% traktorlardy, 34% qus etin jáne 18% sút óndiremiz. Táýelsizdik jyldarynda oblystyń ındýstrııalyq sektory orasan zor serpilis jasady. 1991 jyldan bastap 2020 jylǵa deıin ónerkásip óndirisiniń kólemi 10 mln teńgeden 1 trln teńgege deıin ulǵaıdy, onyń ishinde óńdeý ónerkásibinde 9 mln teńgeden 870 mlrd teńgege deıin ósti», - dedi Ermek Marjyqpaev Óńirlik kommýnıkatsııalar ortalyǵynda ótken brıfıngte.
Óńir basshysy ishki jáne syrtqy ınvestıtsııalardyń arqasynda 35 zamanaýı, iri jáne orta ónerkásiptik kásiporyn qurylǵanyn atap ótti.
«Sońǵy jyldary óńirde qurylys qarqyny artty, jylyna jarty mıllıon sharshy metrden astam turǵyn úı berilýde. Bul oblys ortalyǵy men basqa da eldi mekenderde aıryqsha baıqalady. Sonymen qatar, 30 jylda 7 mıllıon sharshy metrge jýyq turǵyn úı salyndy. 62 myńnan astam aqmolalyq otbasy jańa páterlerge kóshti. Azyq-túlik qaýipsizdigin qamtamasyz etetin agroónerkásiptik keshen óńir ekonomıkasynyń ajyramas bóligi jáne flagmany bolyp qala beredi», - dedi Ermek Marjyqpaev.
Ákimniń málimetinshe, 1991 jyldan bastap aýyl sharýashylyǵynyń jalpy ónimi 11,5 mln teńgeden 682 mlrd teńgege deıin ósken.