Aqmola oblysynda quramynda altyn bar kendi óńdeıtin shaǵyn tseh anyqtaldy

ASTANA. QazAqparat – Aqmola oblysy Stepnogorsk qalasyna qarasty Bestóbe aýylynda quramynda altyn bar kendi óńdeıtin shaǵyn tseh anyqtaldy, dep habarlaıdy QazAqparat Polisia.kz saıtyna silteme jasap.

Stepnogorsk qalasy PB krımınaldyq polıtsııa qyzmetkerleri shaǵyn tsehty 11 qańtarda Bestóbe kenti turǵynynyń sharýashylyq qurylystarynan anyqtady.

Reıdtik is-sharalardy ótkizý kezinde jedel ýákilder 32 jastaǵy er adam zańsyz jabdyqty óz betinshe jınap, materıaldy úıindilerge jınaǵanyn anyqtady.

Alǵashqy tergeý is-sharalarynda polıtsııa shar usatqyshty, jýǵyshty, usaqtaýǵa arnalǵan 10 metall shardy jáne elektr qozǵaltqyshyn tárkiledi. Munda jedel ýákilder jalpy salmaǵy 79 keli bolatyn quramynda altyn bar 2 qap tapty. Bul fakt QR QK-niń 295-1-baby 1-bóligi boıynsha sotqa deıingi tergep-tekserýlerdiń biryńǵaı tiziliminde tirkelgen. Saraptama taǵaıyndaldy.

Foto: polisia.kz